Милош Биковиќ доби син: „Дури откако ќе станеш родител почнуваш да растеш“

Детали

среда, 10 јануари 2024

„Ние прво мислиме дека треба да пораснеме за да добиеме дете, но тука има една стапица – прво добиваш дете, па потоа растеш“ – изјави Милош Биковиќ неодамна. Српскиот актер вчера го доби својот прв син, а прочитајте какви се неговите планови за семејството.

Српскиот актер Милош Биковиќ, вчера (09.01) стана татко и го доби своето прво дете. Неговата свршеница Ивана Малиќ на свет го донесе нивниот син, а парот максимално се труди сите детали да ги задржи за себе и не сподели многу во јавноста.

Според пишувањата во српските медиуми, Милош присуствувал за време на породувањето, а мајката и бебето се чувствуваат добро.

Со оглед на тоа што се роди на големиот празник Свети Стефан, дел од медиумите пишуваат дека актерот најверојатно ќе го крсти синот во чест на овој светец, но засега нема официјални информации од парот.

Интересно е што неговиот син се роди само една недела пред актерот да го прослави својот 36-ти роденден на 13-ти јануари.

Актерот, во свој стил, наместо први фотки од бебето, на социјалните мрежи објави цртеж, нацртан со пенкало на некој дел од телото, а на него се гледаат мајка, татко и бебе, по што следуваа голем број честитки и позитивни коментари.

Инаку, претходно Милош гостуваше во подкаст на една српска телевизија каде отворено зборуваше за предизвиците на родителството, па рече:

„Прочитав некаде дека никој никогаш не зажалил за новиот живот само заради тоа што порано не станал родител. Ние прво мислиме дека треба да пораснеме за да добиеме дете, но тука има една стапица – прво добиваш дете, па потоа растеш, дури тогаш почнуваш да живееш за некој друг“ – изјави Милош.

Актерот кој со години наназад живее на релација Белград – Москва вели дека нема намера да се откаже од кариерата.

Според него, свршеницата Ивана и детето ќе значат еден вид „всидрување“ што ќе биде противтежа на неговите „лудила“.

„Планирам да го малтретирам семејството со авионот таму-ваму. Мојот живот е мој живот. Децата ќе станат исти како тебе.

Не можам да се откажам од некои работи што сум ги создавал цел живот, ќе гледам да им помогнам, но не можам да го стопирам својот живот, не можам да се откажам од сѐ – ќе полудам. На децата не им треба луд татко. Мора да најдам некој баланс“ – изјави Биковиќ.

Инаку, за потсетување, Милош Биковиќ и убавата адвокатка со црногорско потекло Ивана Малиќ се во врска нешто повеќе од две години, а убавите вести за бременоста ги криеја неколку месеци.

Прочитајте и Милош Биковиќ искрено за скромните почетоци: „Мојот син ќе има богат татко, јас немав таква среќа“

Б. С. Б. | Црнобело