Дадилката тврди дека Коста Кецмановиќ бил опседнат со оружје + Детали од судењето на неговите родители

Детали

среда, 31 јануари 2024

„Неколку месеци пред убиствата, Коста почна да чита портал за оружје, постојано зборуваше за оружја, а одеднаш почна да се жали на болки во стомакот и да пелтечи“ – со овие зборови дадилката и куќна помошничка на Коста Кецмановиќ го опиша неговото однесување непосредно пред масакрот.

Во Белград деновиве во тек е судењето на родителите на Коста Кецмановиќ, момчето кое со огнено оружје на 3-ти мај минатата година изврши масакр во основното училиште „Владислав Рибникар“ и уби девет деца и чуварот.

Таткото на Коста, Владимир Кецмановиќ, е обвинет за тешко дело против безбедноста затоа што една година пред масовното убиство го обучувал синот да ракува со огнено и воздушно оружје.

Мајката Милјана е обвинета за недозволено производство, носење, држење и трговија со оружје и експлозивни материи.

За таткото се бара максимална казна од 12 години, додека за мајката се бара затворска казна од 2,5 години.

Иако судењето е од затворен карактер, дел од српските медиуми, повикувајќи се на изјави од присутните на судењето, изнесуваат детали од изјавите на сведоците и од тоа како се одвива судењето.

фото: Јутјуб - принтскрин

Дел од родителите на убиените деца на социјалните мрежи објавуваат статуси дека се згрозени од однесувањето на мајката на Коста, Милијана, која пред судот застанала нашминкана и дотерана, па и фотографирала некои од мајките на убиените деца.

Исто така, внимание привлече и изјавата на дадилката на Коста.

Според порталот Republika, жената која работела како дадилка и куќна помошничка во домот на Кецмановиќ открила детали за неговото однесување неколку месеци пред да го изврши масакрот.

„Помошничката и дадилката пред обвинителот во постапката што се води против Милијана и Владимир Кецмановиќ истакна дека во ноември, 6 месеци пред масакрот, забележала дека Коста почнал да го чита порталот за оружје ‘Калибар’“ – ја пренесува порталот изјавата на изворот и дополнува дека според нејзиното сведочење, Коста постојано зборувал за тоа како се користи оружје и како се употребувало во војните.

фото: X (Твитер)

Според нејзините изјави, Коста почнал да се жали на психосоматски тегоби и на болки во стомакот, а она што сите ги изненадило е тоа што момчето почналo одеднаш да пелтечи иако претходно никогаш немало проблеми со говорот.

На порталот што Коста го читал има најразлични текстови за оружје, балистика и стрелаштво. Може да се прочитаат различни текстови за историски настани, кои оружја се најдобри за преживување, но и видовите на муниција според категоријата.

Инаку, за потсетување, првото рочиште од судењето против родителите започна во понеделникот (29.01), а продолжи и следниот ден. Родителите на Коста се изјаснија за невини.

Таткото на Коста во моментов се наоѓа во притвор, додека мајка му се брани од слобода.

Прочитајте и „Најчесто не се забележува дека детето планира напад“ - Македонскиот психолог Бојана Стојменовиќ за настаните во Србија

Б. С. Б. | Црнобело