Грција одобри истополови бракови и посвојување деца од геј паровите, но не и сурогат мајчинство

Детали

петок, 16 февруари 2024

„Грција е првата православна земја која одобри истополови бракови“. Во оваа насока одат насловите во речиси сите светски медиуми откако вчера (15.02) во Грчкиот парламент беше изгласан законот со којшто им се одобри на хомосексуалните парови да стапат во брак.

Со вкупно 176 гласа „за“ и 76 гласа „против“, вчера во Грчкиот парламент беше донесен законот со којшто ќе се овозможат истополови бракови во Грција.

„Ова е огромен чекор напред за човековите права, којшто е одраз на денешна Грција – прогресивна и демократска земја, која е целосно посветена на европските вредности“ – изјави грчкиот премиер Кирјакос Мицотакис на Твитер, по гласањето.

Дополнително, со новите законски одредби на истополовите парови ќе им биде дозволено да посвојуваат деца.

Инаку, во Грција уште пред десетина година беа дозволени истополови граѓански заедници, но само на биолошките родители им беше дозволено да се грижат за деца, а сега со новите законски измени им се дозволува и на геј паровите да станат родители.

Но, иако на паровите им е дозволено да посвојат деца, сепак нема да им дозволат да добиваат потомство со помош на сурогат мајки.

Инаку, вкупно 15 од 27-те земји членки на Европската Унија веќе ги легализирале истополовите бракови.

Сепак, ваквата одлука не е одобрена кај дел од традиционалните граѓани во Грција - иако огромен дел се согласуваат со одобрувањето на истополовите бракови, многумина од нив не се сложуваат со одлуката за овозможување потомство.

„Грчката црква пред гласањето упати писмо до парламентарците во кое стои дека со овој закон се ставаат правата на хомосексуалната заедница, пред интересите на идните деца, затоа што ќе биде дозволено 'да бидат израснати во истополови заедници и да пораснат без татко или мајка, во средина каде се измешани родовите улоги'“ – пишува CNN.

Б. С. Б. | Црнобело / фото: depositphotos.com