Сите детали за земјотресите на Санторини – колку долго ќе траат, дали ќе биде безбедно за патување?

Детали

петок, 14 февруари 2025

Изминативе неколку недели, во Санторини се забележани илјадници земјотреси. Иако земјотресите се вообичаена појава за островот поради вулканот на којшто се наоѓа, експертите веруваат дека овој пат не се предизвикани од вулканска активност и уште пробуваат да ја утврдат причината. Во меѓувреме, локалците стравуваат за туристичката сезона.

Почнувајќи од јануари годинава, Санторини се соочи со илјадници земјотреси кои иако не предизвикаа голема штета, се верува дека ќе влијаат врз туристичката сезона.

Повеќе од еден месец, потресите на грчкиот остров не престануваат и многу туристи почнале да ги откажуваат аранжманите за претстојните велигденски празници.

Земјотресите се со јачина до околу 5 степени според Рихтеровата скала.

Додека локалците велат дека се навикнати на потресите во Санторини, туристите сепак се исплашени.

„Не дека ми е страв од земјотреси – Санторини постојано се тресе. Загрижен сум дека ќе нема доволно туристи.

Ако сезоната е слаба, нема да заработам доволно пари или нема да им требам за летната сезона“, вели за BBC млад Грк кој секоја година работи на островот.

Иако можеби локалците не се плашат од земјотресите, надлежните прогласија вонредна состојба и веќе три четвртини од луѓето кои живеат на островот се евакуирани.

Па, што точно се случува на Санторини?

Санторини е сместен на синџир острови создадени од вулкан.

Всушност, целиот остров е главно потопена купа на голем вулкан.

Вулканот Санторини е заспан, но сепак е активен и последната ерупција била во 1950 година.

Поради активноста на вулканот, земјотресите во оваа област не се така ретки.

Сепак, она што се случува сега е феномен кој за експертите е нов.

„Невидено е, не сме забележале нешто вакво во модерна Грција“, вели експерт за BBC.

Разликата од вообичаените потреси била тоа што биле забележани многу земјотреси на релативно мала област.

Вулканот Санторини лани летото се разбудил и уште тогаш забележале сеизмичка активност.

Сепак, ситуацијата ескалирала изминатиов месец и сега експертите велат дека се среде „сеизмичка криза“.

Веруваат и дека овие земјотреси немаат никаква врска со вулканска активност.

Засега тие не се сигурни колку долго ќе траат земјотресите, ниту дали помалите потреси на крај ќе предизвикаат поголем земјотрес.

Сепак, повеќето сеизмолози велат дека не треба да се крева паника бидејќи шансите за земјотрес со јачина од шест степени е мала.

Исто така, повеќето не веруваат дека може да дојде до вулканска ерупција, па и цунами, како што се шпекулира.

Експертите анализираат земјотреси во областа од претходните години со надеж дека ќе најдат некаква шема и ќе можат да предвидат што ќе се случи следно.

Во меѓувреме, на островот има полицајци и војници кои се подготвени да помогнат во случај да дојде до посилен земјотрес.

Спирова С. | Црнобело