Живее скромно со татко ѝ, прабаба ѝ се спасила од логорот – Девојчето кое ја глуми хероината во српскиот филм Dara iz Jasenovca

Детали

петок, 26 февруари 2021

„Се плашев кога се мачеа и убиваа луѓе на снимањето, иако знаев дека не е реално. Најтешка сцена ми беше со помалиот брат...“ – изјавува Билјана Цекиќ, 13-годишното девојче кое се прослави во „Дара из Јасеновца“, филмот кој го „крена регионот на нозе“.

Дара из Јасеновца е српски филм кој го прикажува страдањето на Србите, Евреите и Ромите во логорот Јасеновац, за време на Втората светска војна.

Ова е прв српски филм кој се фокусира на оваа тема и сурово ги доловува сцените во еден од страшните концентрациони логори во историјата.

Филмот наиде на позитивни, но и на многу негативни критики од стручните критичари, со објаснување дека се шири националистичка и антихрватска пропаганда, како и дека атмосферата на пеколот не се постигнува со брутални сцени на насилство и со дивјачки испади на злосторниците.

сцена од филмот

Сепак, не може да се одрече дека 13-годишната Билјана Цекиќ, која нема никакво актерско искуство, маестрално ја одигра улогата на Дара, главната хероина во филмот Дара од Јасеновац, кој беше во трка за Оскар и Златен глобус, но не се најде во потесниот круг на избор.

сцена од филмот

Таа е воодушевена од тоа како се снашла во улогата, но и од позитивните критики од публиката, а за српските медиуми изјавила дека сака актерството да стане нејзина професија, бидејќи ѝ се допаднало снимањето на филм и начинот на живот на големите актерски имиња со кои се најде рамо до рамо.

Во филмот се прикажува судбината на Дара, а девојчето признава дека имало моменти кои ѝ биле тешки на снимањето:

„Сцените кога се пука, кога се мачат и убиваат луѓе и деца во логорот се престрашни, како и сценографијата во која снимавме. Знаеш дека тоа не се случува вистински, но сепак се плашиш, бидејќи знаеш дека тие злосторства над народот навистина се случиле.

Дара во логорот остана сама со братот и тоа не беше лесно да се одигра. Најтешко ми беше да ја одглумам сцената кога го држев во мене најмалиот брат и му кажував дека го сакам. Тоа ми беше многу емотивно, бидејќи и јас би направила сѐ за најмилите и тука е сличноста помеѓу мене и Дара“ – изјавува Билјана за српските медиуми.

Сепак, и во реалноста, девојчето нема лесен живот - живее скромно со нејзиниот татко, сестра, брат и нејзините баба и дедо во куќа на село, а според српските медиуми, нејзината мајка ги напуштила пред 6 години.

И покрај тоа што била ангажирана за филмот и маестрално ја одигра улогата, Билјана не ги запоставила училишните обврски.

Семејството живее скромно, домот им е исполнет со икони и семејна топлина, а татко ѝ, бабата и дедото ѝ пружаат голема љубов и поддршка.

фото извор

Таткото на Билјана, Радован Цекиќ, за српските медиуми изјавил дека сам се грижи за своите деца и се бори колку што може.

„Тешко се живее. Работам деноноќно во дрвна индустрија за да успеам да школувам три деца и да ги изнесам на вистинскиот пат. Молам Бога да ме послужи здравјето.“

Претходно, Радован има изјавено дека неговата баба со останати членови од семејството биле дел од страшниот логор во Јасеновац.

„Мојата баба со уште 9 роднини беше во колоната за Јасеновац. Таа преживеа, останатите не. Таа имала среќа да се спаси, а иако поминаа 75 години, сеќавањата на злосторствата се уште живи. Затоа ми е драго што мојата ќерка Билјана добро ја изнесе главната улога.“

Го изгледавте ли филмот? Какви се вашите ставови? Доколку не сте го гледале, предупредуваме на вознемирувачка содржина. 

сцена од филмот

М. М. | Црнобело