Позитива на денот: Танчари од Азија играат на брегот на Охридското Езеро на зајдисонце - минувачите воодушевени (видео)

Детали

петок, 15 септември 2023

„Најверојатно се од Кина и играат пред охриѓани и пред туристиве веќе 3 дена по ред на зајдисонце, покрај кејот и прекрасниот поглед кон Охридското Езеро. Респект!“ - пишува на видеото снимено во Охрид, кое предизвика многу позитивни коментари.

На Фејсбук страницата „Охриѓани“ е објавено видео на кое десетина танчари од Азија танцуваат на брегот на езерото.

Видеото има преку 45.000 прегледи и е вистинска позитива на денот.

„Секојдневието во Охрид не можеш да го сонуваш на други места, а не, пак, да го доживееш.

Батињава најверојатно се од Кина, играат пред охриѓани и пред туристиве веќе 3 дена по ред на зајдисонце, покрај кејот и прекрасниот поглед кон Охридското Езеро. Респект!“, пишува во описот на видеото.

Во коментарите велат дека групата не е од Кина, туку од Јужна Кореја и дека севернокорејците играат поубаво.

Видеото собра над 1.200 лајкови, а имаше и забавни коментари.

Дел од коментарите:

„Од каде и да се - браво!“

„Фали Коне со касетофонон да им помине за перформансот да е поавтентичен“,

„Така е охриѓани, со прекрасниот поглед кон Струга“,

„Колку степени е езерото? Не се капат Кинезиве“, стои во коментарите.

Погледнете го видеото:

А. Ј. | Црнобело