Малиот Никола е бебе-херој: Се роди на Клиниката за гинекологија во Скопје со тежина од 900 грама - по 65 дена си оди дома

Детали

четврток, 21 септември 2023

„Никола е нашиот јунак, вие сте нашите херои“ – им порача таткото на лекарите кои 65 дена пожртвувано се грижеа за неговиот новороден син Никола, кој 65 дена престојуваше на Одделението за интензивна нега и терапија, откако се роди во 27-ма гестациска недела со тежина од само 900 грама на Универзитетската клиника за гинекологија и акушерство во Скопје.

Малиот Никола Ристоски беше роден во 27-ма гестациска недела со тежина од само 900 грама, а вчера (20.09) конечно ја напушти Универзитетската клиника за гинекологија и акушерство во Скопје, откако 65 дена престојуваше на Одделението за интензивна нега и терапија.

Убавите вести беа соопштени на Фејсбук профилот на Клиниката, а благодарност до персоналот упати и таткото на малиот Никола, Љупчо.

Објавата на Универзитетската клиника за гинекологија и акушерство во Скопје гласи:

„Семејството Ристоски конечно можат да се смеат и никој да не им забележи колку гласно тоа го прават, да пеат и повторно никој да не им забележи колку тоа гласно го прават, а посебно најмалиот Ристоски, малиот Никола, големиот борец...

Тој нека се смее... Нека пее и нека потплакува понекогаш гласно, најгласно.

Мило дете, ти посакуваме силно здравје и бескрајно среќно детство“ – стои во објавата на Фејсбук.

Малиот Никола вчера конечно си замина дома со родителите и поголемата сестричка, а убавите вести на Фејсбук ги сподели и неговиот татко, кој им се заблагодари на лекарите за несебичната грижа и пожртвуваност и напиша:

„Бебе Никола е нашиот јунак, Вие сте нашите херои - секоја чест за пожртвуваноста, грижата и љубовта што им ја пружате на сите бебиња“.

Б. С. Б. | Црнобело