Анета од Битола ја донираше косата за дечиња болни од рак: „Ја растев 2 години, никогаш не сум ја фарбала“

Детали

вторник, 17 октомври 2023

Македонската тениска судијка Анета Павловска ја скрати својата долга коса и ја донираше за перики за дечиња болни од рак.

Анета Павловска, македонската тениска судијка која оваа година судеше на Wimbledon и Roland-Garros, направи вистински потег за поздрав - ја потстрижа својата долга коса, со цел од неа да се направи перика за некое наше детенце болно од рак.

Таа во разговор за CRNOBELO.com ни откри дека идејата за да ја донира својата коса ја добила пред околу 2 години.

И иако и претходно се грижела за својата коса, Анета сега тоа го правела со особено внимание, со цел таа да биде здрава и соодветна за од неа да може да се изработи перика.  

„Косата ја растев околу две години, а идејата добив кога на нашите портали прочитав дека Сашка, девојка од Кавадарци, прави перики за деца болни од рак.

Иницијативата ѝ беше за поздрав.

Во изминатиот период неколкупати ја кратев косата со цел да биде здрава. Исто така, никогаш не сум ја фарбала, ниту шатирала.

Инаку, препорачливо е косата да биде долга 40cm, но не смее да биде пократка од 20cm.

Па, така, заедно со мојата пријателка Александра, која исто така ја растеше косата, долго време бевме во постојан контакт со Сашка која ги изработува периките.

Откако се потстрижавме, со Александра косите ги испративме кај неа.

Се надеваме дека ќе изнудиме некоја детска насмевка и ќе внесеме барем малку радост на некое детско лице, но истовремено и дека ќе инспирираме и други луѓе да донираат коса“, ни раскажа Анета.

Прочитајте и Анета Павловска, тениски судија: „Судев на Wimbledon, Новак секогаш нè поздравува, но забранета ни е дружба со тенисерите“

А. Ј. | Црнобело