Станари од Скопје за пофалба – Сами ги декорираа двата влеза во зградата со преубави цртежи на стакло и елки

Детали

петок, 22 декември 2023

„Сè е изработено од соседите, почнувајќи од сијаличките на елките, сè до сликањето на стакло и украсувањето на елките“ – велат во изјава за CRNOBELO.com, станарите на една од најубаво украсените згради во Скопје. 

Во предновогодишниот период, станарите од една скопска зграда се потрудиле заедничкиот простор во влезот да биде убаво украсен и среден.

Со труд и посветеност, станарите одвоиле време за влезот да биде декориран во духот на претстојните празници и со тоа се пример за тоа како треба да изгледа еден заеднички простор во зграда, но и за тоа што значи вистински соживот во станбен објект.

Некој се потрудил и дал придонес со својот талент за сликање, други со украсување на елки и средување на останатиот дел од просторот. Сè на сè, овие станари се пример дека заедничкиот труд може да даде резултат.

Двата влеза во зградата се декорирани речиси идентично, со новогодишни елки со сребрени лампиони и сијалички, цртежи на огледалата, но и на стаклата од влезните врати. Исто така, декориран е и дворот пред влезовите.

Па, затоа оваа зграда на улицата „Методија Ш. Шарло“ е еден од најубаво накитените простори во главниот град.

„Сè е изработено од соседите, почнувајќи од сијаличките на елките, сè до сликањето на стакло и украсувањето на елката“ – вели во изјава за CRNOBELO.com Александар, еден од станарите на зградата.

Тој вели дека цртежите се дело на Билјана Цветанова, која се занимава со цртање мурали, а зградата се наоѓа во населбата Аеродром и тамошните жители ја нарекуваат „зградата со бунарчето“.

Во продолжение погледнете неколку фотки од влезовите:

Погледнете и кратко видео од уредувањето:

Б. С. Б. | Црнобело