Мала хероина: Анабела од Охрид се роди со 600 грама, по 129 дена на ГАК конечно си отиде дома

Детали

вторник, 26 декември 2023

„Нашата Анабела по 129 дена си замина за Охрид во прегратките на мама, тато и на дада. Нејзината силна борба беше мотивација за целиот персонал да верува дека чудата постојат и овој голем борец им одржа лекција на сите возрасни што значи вистинска борба за живот, без да потклекнеш“, напишаа од Клиниката за гинекологија и акушерство.

Анабела Блажеска, бебето од Охрид кое се роди во 26-та недела со само 600 грама, денес (26.12) си замина дома од Клиниката за гинекологија и акушерство.

Анабела помина 129 дена во болницата, а докторите кои се грижеа за неа велат дека е вистински мал борец кој им одржа лекција на возрасните што значи борба за живот.

Родителите ја дотераа својата принцеза во бело фустанче со розова панделка, па сите заедно - мајката, таткото и постарата сестричка - си заминаа среќни за Охрид.

„Принцезата од 600 грама си отиде дома со 2.080 грама.

Нашата Анабела Блажеска денес по 129 дена си замина за Охрид во прегратките на мама, тато и на дада.

Родена е во 26 гестациска недела со тежина од само 600 грама.

Заедно со докторите и со медицинските сестри успешно ги помина сите препреки кои пред неа ги стави животот и дома си замина со тежина од 2.080 грама.

Нејзината силна борба беше мотивација за целиот персонал да верува дека чудата постојат и овој голем борец им одржа лекција на сите возрасни што значи вистинска борба за живот, без да потклекнеш.

Расти Анабела во многу љубов, здравје и среќа. Биди им гордост на твоите родители“, напишаа на Фејсбук страницата на Универзитетската клиника за гинекологија и акушерство.

А. Ј. | Црнобело