Вечерва не се оди на гости, ниту пак се излегува од дома – Православните христијани го слават Бадник

Детали

сабота, 06 јануари 2024

Што треба да се направи со бадниковото гранче? Каква треба да биде трпезата? Што не треба да правите на овој ден? Кои се некои од најчестите верувања што се поврзуваат со празникот Бадник?

Православните христијани денес (06.01) го слават Бадник, денот пред Божиќ, со којшто започнуваат божиќните празници.

Во некои краеви од Македонија, прославата започна уште минатата ноќ со палењето на коледарските огништа, а утрово семејствата треба да се разбудат со коледарската песна на коледарчињата.

Околу празникот Бадник се врзуваат повеќе обичаи и верувања. Се верува дека името на празникот има старословенско потекло и означува да бидеш буден, односно таа вечер сите домашни луѓе треба да останат будни и се врзува со бдеењето покрај обредниот оган.

Според традиционалните обичаи, денот треба да започне со засекување на бадниковото дрво (најчесто дрво од даб). Уште во раните утрински часови, домаќинот на куќата треба да замине и да го засече бадниковото гранче.

Според некои верувања, бадниковото дрво треба да се засече со три силни удари, а она што секирата нема да може да го засече се довршува со кршење или извртување и тој скршен дел на дрвцето се нарекува „брада“.

Се верува дека бадниковото дрво треба да се остави надвор, исправено покрај ѕидот на куќата, а да се внесе во домот навечер и подоцна во вечерните часови да се запали во домашното огниште, како симбол на топлината во домот.

Со оглед на тоа што со Бадник завршуваат божиќните пости, трпезата оваа вечер треба да биде посна, но разновидна. Во нашите домови традиционално се подготвува бадниково лепче, кое треба да се подели на сите членови на семејството, посно гравче, сарма, риба и други посни јадења.

Исто така, традиционално на масата се става и кисела зелка, туршија, суви сливи, смокви, ореви, костени...

Се верува дека Бадник е празник во кој семејството вечерта треба да остане дома и кога не се излегува од домот, ниту пак се оди некаде на гости.

Б. С. Б. | Црнобело/ фото: depositphotos.com