Славчо Попоски, метеоролог: „Можни се обилни врнежи од дожд, грмотевици, но и појава на град“

Детали

понеделник, 11 март 2024

„Очекуваме повремен пороен дожд и услови за појава на грмежи, како и засилен ветер. Поради обилните дождови, можни се и локални, краткотрајни поплавувања“, вели метеорологот Славчо Попоски.

Променливото време е карактеристично за март, па иако месецов е натпросечно топол, имаме и облачно и врнежливо време.

Врнежите од дожд ќе можеме да ги очекуваме и во наредните ден-два, барем на некои места во Македонија.

Во некои делови, можно е да има и појава на грмежи.

Прогнозата на метеорологот Славчо Попоски:

„Денес и утре, и тоа под влијание на нов длабок циклон од Атлантикот, во Македонија повторно очекуваме нови обилни врнежи од дожд на повеќе места, проследени со грмежи.

Не се исклучува можноста повторно локално да се случат поинтензивни атмосферски процеси во форма на невреме, проследено со обилен пороен дожд, силен ветер, електрични празнења и со појава на град.

Денес ќе дува засилен, повремено силен ветер од јужен правец (повремено и локално со брзина од над 70km/h). Остануваат високите пролетни температури на воздухот.

И во Скопје очекуваме слично време денес и утре, со повремен пороен дожд и услови за појава на грмежи. Ќе дува засилен ветер од јужен правец, особено во текот на денешниот ден.

Да напомниме дека повремено на високите планини ќе има провејување на снег.

Според моменталните анализи со кои располагаме, со помош на најпрецизниот нумерички модел (ECMWF – Европски центар за среднорочна прогноза), седмицата која е пред нас ќе биде и понатаму пролетно топла, иако календарски е сè уште зима, но и со повеќе врнежи.

Најмногу врнежи ќе имаме денес и утре, кога е можна појава и на локално невреме со електрични празнења и со појава на град.

Топло ќе биде и во најголемиот дел од Европа.

НАПОМЕНА: Во случај на појава на електрични празнења да не се престојува на отворен простор и под осамени дрвја, исто така локално се очекува позначително количество на воден талог (над 25 литри). Доколку се случат овие врнежи за краток период, и тоа поради очекуваната нестабилност, можни се локални краткотрајни поплавувања“.

Спирова С. | Црнобело

фото: Фејсбук, freepik.com