Малата Срна (3) конечно си оди дома од болница по операцијата – мајката се заблагодари на хуманиот народ

Детали

петок, 15 март 2024

„Д-р Ристо Симеонов, немам зборови да опишам колку сме ви благодарни! Затворивте едно поглавје од приказната на нашата Срна. Народе наш, благодарение на сите вас денес си ја носиме дома“ – напиша мајката на малата Срна (3), откако се собраа средствата за лекување од донации. 

Откако на 7-ми март со донации од граѓаните беа собрани парите потребни за лекувањето на Срна (3), денес нејзината мајка Васка на Фејсбук објави фотографии од болницата и откри дека нејзината мала ќерка конечно си оди дома.

Таа му се заблагодари на Д-р Ристо Симеонов кој ја оперирал и се грижел за Срна, но и на целиот медицински персонал кој дал сè од себе за малото девојче да се чувствува пријатно.

Не ги заборави ни граѓаните на Македонија, кои се сплотија и за неполн ден собраа скоро 1 милион денари за лекувањето на Срна.

„Д-р Ристо Симеонов, немам зборови да опишам колку сме ви благодарни! Затворивте едно поглавје од приказната на нашата Срна и тоа успешно!

Како родители решивме да не чекаме повеќе и да го олесниме нејзиното лекување. Целосно ви ја доверивме, а вие целосно ѝ се посветивте.

Срна имаше класична отворена операција за отстранување на каменот, кој веќе беше тргнал надолу. Каменот голем, но мал за вашата стручност, грижа и топлина.

Кога ме свикаа сестрите да одам во соба за будење, вие бевте до неа и ме пречекавте со насмевка. Во истиот момент ми падна камен од душава.

Медицинскиот персонал од Acibadem Sistina Hospital, вие мили тетки и дадички ни бевте ветер во грбот. Толку бевте внимателни и трпеливи кон Срна, но и кон нас како родители.

Народе наш, благодарение на сите вас денес си ја носиме дома.

Но повторно ќе се вратиме тука, следат контроли и нови испитувања. Среќна сум што имаме каде и има кој...“, напиша мајката на Срна.

Прочитајте и Секоја чест! За неполн ден собрани скоро 1 милион денари за лекувањето на Срна

А. Ј. | Црнобело