Христина Пан по третманот на ќерка ѝ (2) во Турција: „Хероинава победи уште една претешка битка“

Детали

среда, 03 април 2024

„Уште една голема и претешка битка победивме, победи хероинава, мала, а најголема! Имаме уште малку за војување, ама сѐ што треба да знаете е дека Тара е добра, фала му на Господ“, напиша на Инстаграм Христина Пан, која лани откри дека една од нејзините ќерки близначки е болна и прима терапија.

Христина Младенов, која на Инстаграм е позната како @hristinapan, по неколкугодишната борба со неплодност, во јули 2022 стана мајка на близначки.

Но, пред нејзините ќерки Тара и Хана да наполнат една година, таа во јавноста откри дека едното од бебињата е болно и почнало да прима хемотерапија.

Христина со ќерката Тара (која наскоро ќе наполни 2 години) прво помина неколку месеци во болница во Скопје, каде што ја примија првата хемотерапија, а потоа беа и во Словенија во ноември 2023.

Тие сега се вратија и од Турција, каде што поминаа повеќе од два месеца, а каде што малата хероина беше на лекување.

Христина преку Инстаграм откри дека се конечно дома и дека извојувале уште една голема битка.

Таа објави неколку фотографии од аеродромот во Скопје, каде што ги пречекале со цвеќе и балони за добредојде.

„Видете кој си дојде дома денес. Уште една голема и претешка битка победивме, победи хероинава, мала, а најголема!

Имаме уште малку за војување, ама сѐ што треба да знаете е дека Тара е добра, фала му на Господ. Фала на цел медицински персонал од болницата“, напиша таа меѓудругото.

Нејзините следбеници по објавата им дадоа поддршка на мајката и ќерката.

„Со душа ги чекавме овие убави вести“, „Лошото нека остане минато“, „Браво за малата хероина“, се дел од нивните коментари.

Пред да заминат на лекување во Турција, Христина преку Инстаграм Стори одговараше на прашања поврзани со болеста на нејзината ќерка, па нагласи дека Тара нема леукемија.

„Тара има Neuroblastoma Metastasticum, за жал малигна болест која не ја откривме на време поради тоа што симптомите се појавија подоцна. Ваквите малигни болести се подмолни и тешко се откриваат навреме.

Тара имаше само 10 месеци кога почна агонијата. Неполн месец пред првиот роденден имавме конечна дијагноза и почна со хемотерапија. Не се работи за леукемија“, напиша таа. 

Пред да ги добијат близначките, Христина и нејзиниот сопруг две години се обидувале да добијат дете, а за тоа таа раскажа во интервју за CRNOBELO.com.

Поттикнати од пораката на новата иницијатива на Македонски Телеком „Да направиме место за вистински да се поврземе“, којашто поттикнува отвореност и меѓусебно разбирање, за што говореше и Горан Стефановски, редакцијата на CRNOBELO.com ќе направи повеќе место за добри вести и приказни кои инспирираат.

А. Ј. | Црнобело