Славчо Попоски, метеоролог: „Ќе има обилни врнежи од дожд, но и можна појава на снег“

Детали

четврток, 11 април 2024

„Од средината на месецов, кон нашите краишта ќе дојде до спуштање на значително поладен воздух кој ќе ги намали температурите за повеќе од 10 степени“, вели метеорологот Славчо Попоски.

Веќе ја пречекавме пролетта, ја заменивме зимската гардероба со пролетна и летна, а и дрвјата околу нас се расцутени.

Сепак, според метеоролозите, изгледа дека топлото време ќе биде заменето со постуден бран кој ќе создаде можност дури и за снег.

Во продолжение, прогнозата на метеорологот Славчо Попоски:

„Покрај мене, и сите познати метеоролози од регионот се едногласни - од средината на овој месец, како и во втората половина од овој месец, преку Атлантикот и потоа од северозападна Европа, кон нашите краишта ќе дојде до спуштање на значително поладен воздух кој ќе ги намали температурите за повеќе од 10 степени, и од рано-летни тие ќе се претворат во есенско-зимски.

Сè поизвесно е есенско-зимско сценарио следната седмица кај нас на Балканот. Покрај обилните врнежи од дожд следната недела, очекуваме и обилни врнежи од снег на планините во регионот, а по сè изгледа и кај нас во Македонија.

На планините во регионот понекаде би можело да се формира снежна покривка со висина од 20 до 30 сантиметри, на некои места таа би можела да биде со висина и од над 50 сантиметри.

Секако, ова важи за високите планински места во регионот.

Поради падот на температурите, снежната граница понекаде во регионот би се спуштила и пониско (под 1000 метри). Можно е дури снежни врнежи да се појават и во градовите во регионот следната недела.

Покрај ова, следната седмица сè поизвесна е појава и на утрински мразови, кои секако особено лошо ќе се одразат врз веќе расцутените овошки“.

Спирова С. | Црнобело

фото: freepik.com, Фејсбук