Славчо Попоски, метеоролог: „Во среда силно невреме, а од четврток заладување со снег на планините“

Детали

вторник, 16 април 2024

„Од четврток следува период на значително пониски температури (за повеќе од 10-15 степени во споредба со сегашните) и со повремени локални врнежи од дожд, а на планините ќе има и повремени врнежи од снег“, вели метеорологот Славчо Попоски.

По вчерашниот мошне топол ден со температури до 30-тиот степен, нè очекува значително заладување, па дури и услови за појава на невреме, како и снег на планините.

Во продолжение, прогнозата на метеорологот Славчо Попоски:

„Максималните дневни температури вчера се искачија во интервалот од 25 до 32 степени, што значи дека тоа беше најтоплиот ден од овој топол африкански бран.

Веќе денес попладне и навечер, во текот на ноќта кон среда, а особено во среда, поради спуштање на силен ладен атмосферски фронт од север и од северозапад, во Македонија ќе дојде до создавање на локални, но силни грмотевични облаци.

Токму ова ќе услови врнежи од дожд, на повеќе места ќе има обилни врнежи, проследени со грмежи како и со силен јужен ветер (над 70 километри на час).

Локално, овие просеци ќе бидат застапени во форма на поизразено невреме, проследено со силни електрични празнења, олуен ветер, обилен пороен дожд (над 30 л.м2) и силен град, особено во централните делови и во источната половина од државава.

Услови за локално невреме ќе има и во скопскиот регион.

Потоа, од четврток следува период на значително пониски температури (за повеќе од 10-15 степени во споредба со сегашните) и со повремени локални врнежи од дожд, а на планините ќе има и повремени врнежи од снег.

НАПОМЕНА: Во периодот од вторник доцна попладне, навечер, во текот на ноќта кон среда, а особено во среда, во случај на појава на невреме и на електрични празнења, да не се престојува на отворен простор и под осамени дрвја“.

Спирова С. | Црнобело

фото: freepik.com, Фејсбук