14-годишните Ана и Ивона од Радовиш помагаат на лица со посебни потреби: „Научивме дека секој може да направи сѐ“

Детали

вторник, 23 април 2024

„Со нас работат и волонтираат и лица со посебни потреби. Со тоа научивме дека секој може да направи сѐ!“ – велат овие две девојчиња од Радовиш кои своето слободно време несебично го вложуваат за да им помогнат на луѓето што имаат потреба од помош, а со тоа се надоградуваат и себеси.

Додека голем број нивни врсници слободното време го поминуваат пред компјутер или со мобилниот телефон, овие две девојчиња од Радовиш се посветени на волонтерската работа.

Тие се вклучени активно во проектите на националната алатка на Црвениот крст на Република Северна Македонија, Црвен крст во акција – промоција на хумани вредности (ЦКА – ПХВ) во Радовиш. 

Ивона Ставрова и Ана Петровска (14) од Радовиш за читателите на CRNOBELO.com ја раскажуваат својата приказна со цел да поттикнат поголем број млади луѓе да го следат нивниот пример.

Овие две девојчиња активно се вклучени во работата на дневниот центар „Порака“ , каде активно помагаат и се дружат со лицата со специјални потреби.

„Нашата волонтерска приказна започна со трите обуки од ПХВ програмата.

Потоа продолжи со ‘Бумеранг на среќата’, проект во којшто делевме пораки до институциите и им се заблагодарувавме.

Потоа со сите волонтери го разубавивме влезот на општинската организација на Црвениот крст во Радовиш“ – раскажуваат тие.

Овие две девојчиња досега биле вклучени во повеќе проекти. Освен што работат во дневниот центар „Порака“, помагале при скриниг на пациенти во Здравствениот дом во Радовиш, а учествувале и во тактичко показна вежба за заштита од пожари во основните училишта во градот.

За работата со лицата со посебни потреби од дневниот центар „Порака“ велат дека е најважно што и дел од овие лица биле вклучени како волонтери и ги вршеле истите активности со нив.

„Со тоа научивме дека секој може да направи сѐ!“ – велат овие две девојчиња.

Освен што активно се вклучуваат во проектите на Црвениот крст, Ана и Ивона имале и обука за јавен говор, а научиле како да прават и промотивни видеа.

По повод Денот на лицата со Даунов синдром, тие две биле вклучени во изработка на промотивно и информативно видео.

https://www.facebook.com/watch/?v=2584287281732710

Овие две девојчиња велат дека се среќни што нивната рутина целосно се променила, а нивната желба е да продолжат да волонтираат и понатаму и да учествуваат на општински и регионални натпревари по прва помош.

Тие две се доказ дека да се биде волонтер значи да имаш огромна желба и срце за да помогнеш, а времето ќе се најде секогаш.

©CRNOBELO.com Забрането преземање и копирање. Крадењето на авторски текстови е казниво со закон.

Б. С. Б. | Црнобело