Гест за пример! Волонтери го расчистија ѓубрето околу скопскиот Аквадукт
- Детали
- петок, 26 април 2024
„Преубави ентузијастички луѓе за 2 часа го претворија Аквадуктот од депонија во рај и наполнија не еден, туку 2 камиона до горе со сѐ и сешто - од пластични шишиња, до огромни и тешки гуми, теписи, тоалетни школки и разни други чудни ‘ствари’,“ напишаа организаторите на волонтерската акција.
Еколошкото движење „За почиста Македонија“, чија цел е да ја зголеми свеста за еколошки начин на живот и градење општество без ѓубре, организираше акција за чистење на ѓубрето кое се наоѓа во околината на скопскиот аквадукт.
Организаторите испратија јавен апел до сите што сакаа да се приклучат на акцијата да дојдат кај Аквадуктот.
По два часа чистење, велат, дека просторот околу Аквадуктот го претвориле од депонија во рај, па на социјалните мрежи објавија фотографии од нивната еко-акција.
„Прекрасна акција кај Аквадуктот. Дождот од претходниот ден се повлече и дозволи да се соберат преубави ентузијастички луѓе кои за 2 часа го претворија Аквадуктот од депонија во рај и наполнија не еден, туку два камиона до горе со сѐ и сешто - од ситно ѓубре, како пластични шишиња, до огромни и тешки гуми, теписи, веце шолји и разни други чудни ‘ствари’.
Да повториме, не чистиме само за да биде почисто, туку за да инспирираме и мотивираме што повеќе луѓе да се грижат за нивната околина и да бидат активни во нејзиното сочувување.
Не барајте човек за пример. Бидете примерот!“, напишаа меѓу другото во својата објава и им се заблагодарија на сите што им помогнале да ја организираат оваа еко акција.
Овој чин предизвика воодушевување во јавноста, па волонтерите и организаторите добија бројни пофалби.
„Екипа за пример! Вака се сака и чува Македонија“, „Секоја чест другари“, „Браво за иницијативата и реализацијата. Посакувам да допре до надлежните и да стане редовна пракса!“, „Мотивирате и инспирирате“, се дел од коментарите.
Но, на Фејсбук имаше и такви кои ги критикуваа.
„За секоја пофалба, ама на крајот ја ‘упрскавте’! Воопшто не ви требаше пентарењето на Водоводот. Тој и без тоа е во многу лоша состојба и сигурно сте му нанеле дополнителна штета со вашето пентарење! Покажавте отсуство на свест за потребата од заштита на спомениците на културата!“, стои во еден од коментарите.
Повеќе фотографии од еко-акцијата:
А. Ј. | Црнобело
Би можело да ве интересира:
Препорачуваме
Најчитани неделава
