Славчо Попоски, метеоролог: „И оваа недела екстремно топло време – температури над 40˚C и тропски ноќи“

Детали

понеделник, 15 јули 2024

„Температурите во текот на ноќните и раните утрински часови нема да се спуштаат под 20 степени Целзиусови“, вели Славчо Попоски за оваа недела.

Топлотниот бран што нè измачува веќе некое време ќе продолжи и неделава, а температурите може да надминат и 40 степени Целзиусови.

Во продолжение, прогнозата на Славчо Попоски за оваа недела:

„Екстремно топлиот африкански бран во Македонија продолжува и во текот на оваа работна недела, а времето ќе биде стабилно, суво и сончево, со појава на мала до умерена локална облачност.

Температурите ќе се искачуваат во интервалот од 35 до 43 степени Целзиусови, додека во најтоплите централни и југоисточни предели, температурата локално би можела да се искачи и до околу 45 степени Целзиусови.

Во Скопје температурата во текот на оваа работна недела ќе се искачи до околу 40 степени Целзиусови, но повремено таа ќе надминува и 40 степени Целзиусови.

УВ индексот ќе има екстремно висока вредност 10, па затоа апелираме граѓаните да не излегуваат во најтоплиот дел од денот (од 11 до 17 часот), како и да пијат повеќе течности.

Тука се и тропските ноќи, односно температурите на повеќе места во Македонија во текот на ноќните и раните утрински часови нема да се спуштат под 20 степени Целзиусови“.

Спирова С. | Црнобело

фото: Фејсбук, freepik.com