Браво! Македонски ученици освоија 1 златен и 2 бронзени медали на Математичка олимпијада

Детали

понеделник, 22 јули 2024

Дамјан Давков во 2021-ва, на само 13 години го освои првиот сребрен медал на Интернационалната математичка олимпијада, а сега освои злато. Со 1 златен и два бронзени медали на овогодишната математичка олимпијада, нашите млади математичари покажаа дека имаме со што да се гордееме.

Македонските репрезентативци од 65. Интернационална математичка олимпијада (ИМО 2024) дома се враќаат со високи резултати.

Тие успеаја да освојат еден златен, два бронзени медали и 3 пофалници, што уште еднаш е доказ дека ние како држава поседуваме голем број исклучително талентирани млади генијалци со кои треба да се гордееме.

Како што информираат од Сојузот на математичари на Македонија, Олимпијадата се одржувала во периодот од 11-22 јули, а вкупно 609 млади математичари се натпреварувале во решавање шест математички проблемот во текот на два натпреварувачки дена.

Секој натпреварувач се стреми да освои максимални 7 поени од секоја задача.

„Ова е исклучителен успех за нашата земја, која во конкуренција на 109 држави екипно се пласира на 28. место (според освоени одличја) односно, на 46. место (според освоени поени)“ – велат од Сојузот.

Инаку, златниот медал на Македонија ѝ го донесе штипјанецот Дамјан Давков, кој успеа да освои вкупно 31 поен.

Во 2021-ва година, на возраст од само 13 години, Дамјан успеа да го освои првиот сребрен медал на Математичката олимпијада.

„Ова е само второ македонско злато на ИМО во досегашните 32 учества на Македонија како независна држава. Штипјанецот Дамјан Давков, со освоениот златен медал, втора година по ред се вбројува во светската математичка елита.

Ова 16-годишно момче е несомнено најуспешниот македонски олимпиец на сите времиња – во досегашните пет учества, има освоено два златни медала, два сребрени медала и една пофалница – и цврсто чекори кон тоа да постане еден од најуспешните олимпијци во историјата на ова престижно светско натпреварување“ – велат од Сојузот на математичарите.

Леонид Тодороски и Алексеј Тасиќ освоија бронзени медали, а Бранко Јангелоски, Ивано Божиновски и Никола Цветаноски добија пофалници.

Б. С. Б. | Црнобело / фото: Фејсбук