Од денес почнуваат Богородичните пости – Наредните 2 недели ќе покажат какво ќе биде времето во цела година

Детали

среда, 14 август 2024

Од денес почнуваат деновите што во народот се познати како Макавеи, кога се предвидувало какво ќе биде времето во текот на цела година, а истовремено започнува и строгиот пост посветен на празниците Преображение Христово и Успение на Пресвета Богородица.

Од денес (14.08) започнуваат богородичните пости, посветени на големите празници коишто се ближат, а траат само две седмици.

Првата седмица од постите е посветена на празникот Преображение Христово (19.08), а втората е посветена на празникот Успение на Пресвета Богородица, познат и како Голема Богородица (28.08).

Ова е најкраткиот од четирите годишни пости, а е мошне сличен со постите пред Велигден.

Правилата за постот се следни: Од понеделник до петок се пости строго, без масло, додека во сабота и недела е дозволено да се консумира масло.

За празникот Преображение Христово се дозволува да се консумира масло и риба.

Во некои краишта кај нас постои уверувањето дека во рамките на овие пости првата недела се пости без масло, а втората со масло, но тоа уверување не е точно и не е прифатено од нашата црква.

Според православниот календар, постот треба да трае заклучно со празникот Успение на Пресвета Богородица, кога е дозволено да се јаде риба и масло.

Инаку, Богородичните пости, секоја година започнуваат на ист датум, на празникот седумтемина Макавеи, кој многу се почитувал во минатото.

Според нив се гледало какво ќе било времето. Според верувањата, на овој ден не се работело, а во првите 12 дена можело да се прогнозира какво ќе биде времето во наредните 12 месеци.

Според верувањата секој ден од 14 до 25-ти август означувал по еден месец.

Според едни толкувања ако тој ден времето било убаво, тоа значело дека во месецот што го означува тој ден времето ќе било убаво.

Според други толкувања пак, ако на 14-ти август времето е жешко, тоа значи дека јануари ќе биде многу студен, а ако на 15-ти времето е постудено, тоа значи дека февруари ќе биде потопол.

Речиси во сите краишта овој ден се сметал за тежок празник, а освен што постеле и не работеле, во некои краишта жените верувале дека во овој период децата не треба да се бањаат.

Б. С. Б. | Црнобело/ фото: depositphotos.com