Славчо Попоски, метеоролог: „Од четврток пороен дожд и грмежи на повеќе места во Македонија“

Детали

понеделник, 26 август 2024

„Дневните температури ќе се искачуваат во интервалот од 26 до 35 степени Целзиусови, додека наутро ќе биде посвежо, со температури кои ќе се спуштаат во интервалот од 11 до 20 степени Целзиусови“, вели Славчо Попоски за оваа недела.

Се чини дека екстремно високите температури конечно ќе почнат да се намалуваат, а во текот на неделава ќе има и појава на локално време.

Во продолжение, прогнозата на Славчо Попоски за претстојната недела:

„Од денес (понеделник) па во деновите потоа, полека територијата на Македонија ќе потпаѓа под влијание на висински циклон кој ќе биде со центар јужно и југоисточно од нас, односно некаде над Грција и Турција.

Во ваква ситуација, во попладневните часови атмосферата полека ќе се дестабилизира и ќе има развој на локални грмотевични облаци кои ќе условуваат појава на пороен дожд, грмежи и засилен ветер.

Од денес (понеделник) до среда, условите за нестабилност нема да бидат премногу големи, што значи процесите ќе бидат локални.

Многу поголеми услови за нестабилност во попладневните часови ќе имаме од четврток па натака кога на повеќе места во Македонија ќе има појава на пороен дожд, грмежи и засилен ветер.

Не се исклучува можноста и за појава на локално краткотрајно невреме, проследено со силен ветер и со појава на град.

Што се однесува до температурите, тие за време на овој период секој нареден ден ќе бележат тенденција на постепен пад, а особено пад на истите ќе има во втората половина од седмицата кога максималните дневни температури на воздухот ќе се искачуваат во интервалот од 26 до 34 степени Целзиусови.

Наутро, пак, ќе биде поприлично свежо, со минимални температури кои ќе се спуштаат во интервалот од 11 до 20 степени Целзиусови“.

Спирова С. | Црнобело

фото: Фејсбук, freepik.com