Славчо Попоски, метеоролог: „Од недела очекувајте летни температури поради топол бран од Африка“

Детали

среда, 28 мај 2025

„За време на викендот времето, во Македонија ќе биде сончево со мала до умерена облачност, а ќе дува и слаб до умерен ветер од северен правец. Ќе има услови и за ретка појава на краткотраен дожд со ретки грмежи“, вели Славчо Попоски за претстојниот викенд.

По врнежливиот и студен мај, според прогнозите, јуни ќе започне со повисоки, летни температури.

Иако викендов може да има услови за краткотраен дожд, температурите ќе бидат значително повисоки.

Во продолжение, прогнозата на Славчо Попоски:

„Почнувајќи од викендов, особено од недела (1 јуни) во Македонија ќе започне приливот на топол воздух со потекло од Африка. Во ваква ситуација, температурите значително ќе бидат во пораст, што значи дека конечно може да очекуваме летни температури на воздухот.

Инаку, за време на викендот, односно во сабота и недела, времето во Македонија ќе биде сончево со мала до умерена облачност, а ќе дува и слаб до умерен ветер од северен правец. Ќе има услови и за ретка појава на краткотраен дожд со ретки грмежи.

И во Скопје и околината, за време на викендот ќе започне порастот на температурите на воздухот, а времето ќе биде претежно стабилно, суво и сончево, со мала облачност и со слаб до умерен ветер од северен правец.

Температурите, како што погоре напомнав, особено од недела (1 јуни) ќе бидат летни и во значителен пораст и ќе се искачуваат во интервалот од 20 до 28 степени Целзиусови.

Во Скопје и околината температурата за време на викендот ќе се искачи до околу 27 степени Целзиусови“.

Спирова С. | Црнобело

фото: Фејсбук, freepik.com