Нашиот Матеј, пред финалето на светскиот избор за најдобар модел: „Би било прекрасно да ја донесам титулата во Македонија“

Детали

понеделник, 09 јуни 2025

„Очекувањата од утрешното финале се големи. Се надевам дека ќе се претставам со самодоверба, шарм и достоинство. Би било прекрасно да ја донесам титулата дома, но најважно ми е што ја носам Македонија со себе каде и да одам“ - вели Матеј Павловски, нашиот претставник на светскиот избор за машки модели, Manhunt 2025. 

Македонскиот модел Матеј Павловски (24), член на Max Models, е наш претставник на изборот за најдобар светски модел Manhunt 2025, кој годинава се одржува во Бангкок.

Ова е еден од најпопуларните светски избори за мажи, а Матеј е првиот Македонец кој се натпреварува на него.

Истовремено, тој е единствениот претставник од Балканот и еден од малкуте Европејци кои учествуваат на годинешното издание на изборот, а на кој за титулата најдобар светски модел се борат 37 мажи.

Финалето на изборот е закажано за утре (10.06), а за CRNOBELO.com, Матеј раскажа дел од своето искуство и впечатоци од изминатите две недели поминати на Manhunt 2025:

„По професија сум модел, а паралелно студирам на Правниот факултет при Универзитетот 'Св. Кирил и Методиј' во Скопје, каде што се стекнувам со високо образование од областа на правните науки.

Професионално се занимавам со фитнес и моделинг повеќе години, така што би излажал ако кажам дека не посакував да yчествувам на еден ваков реномиран светски избор.

Затоа и бев пријатно изненаден кога го забележав отворениот повик за дури пет престижни интернационални машки избори, за кои од годинава лиценците ги поседува господинот Шаќир Села, организатор на изборот за Мис на Македонија и сопственик на познатата агенција Daman во Истанбул.

Веднаш испратив свое портфолио со фотографии и видеа, а на мое големо изненадување, уште побрзо добив позитивен одговор на пријавата.

Бев повикан на разговор каде официјално ми беше потврдена одлуката на целиот тим да ја претставувам Македонија, а потоа заминав на финални подготовки во Турција.

Чест ми е што сум првиот македонски претставник на Manhunt International, најстариот глобален избор за мажи, избор со најдолга традиција.

Тука, во Бангкок, искуството е незаборавно! Деновите ни се исполнети со активности - имаме фотосесии, интервјуа, вежби за сценски настап, посети на културни знаменитости, па дури и часови по голф.

Меѓу момците владее добра енергија, која создава позитивна и пријатна атмосфера.

Сите сме мотивирани да го дадеме најдоброто од себе и да го искористиме ова искуство максимално.

Што се однесува до фаворитите, се зборува за неколку фаворити, особено претставниците од Европа, кои имаат силна поддршка и впечатливо присуство.

Сепак, натпреварот е отворен и сè се менува од ден на ден.

Еден од највпечатливите моменти во Бангкок беше запознавањето со Muay Thai - традиционална тајландска боречка вештина.

Гледав тренинг во живо и бев фасциниран од дисциплината, енергијата и прецизноста што ја носи овој спорт.

Тоа беше навистина инспиративно искуство кое ми покажа колку се важни фокусот и внатрешната сила - не само во спортот, туку и во животот.

Очекувањата од утрешното финале се големи.

Се надевам дека ќе успеам да се претставам во најдобро светло, со самодоверба, шарм и достоинство.

Секако, би било прекрасно да ја донесам титулата дома, но најважно ми е што ја носам Македонија со себе каде и да одам и што создавам искуства и пријателства што ќе траат цел живот“.

Повеќе фотографии од Матеј на следната страница...