Андреј ја запроси Дајана на крстарење по Јонско Море: „Од околните јахти аплаудираа, прстенот е совршен“

Детали

вторник, 10 јуни 2025

„Се спремив за фотографирање на преубавата тиркизна позадина, морето беше немирно, па едвај чекавме да тргнеме кон Кефалонија. Но додека се сликавме, еден од пријателите во позадина извади транспарент со натпис 'Дали ќе се омажиш за мене?', а Андреј клекна на колено со прстенот,“ - вели Дајана за романтичното запросување на Закинтос.

Дајана Стаматовска (27) од Сараево, која 13 години живее во Скопје и работи во областа на естетската медицина, се сврши со скопјанецот Андреј Најдоски (28), основач и сопственик на моден бренд.

Парот е заедно 7 години, а својата љубов наскоро ќе ја крунисаат со брак, откако Андреј ја запроси Дајана на катамаран, покрај познатата плажа Навагио на Закинтос, додека пловеле по Јонско Море.

За романтичниот момент во бескрајното синило и нивната љубовна приказна, Дајана раскажа за CRNOBELO.com:

„Се запознавме преку заеднички пријатели, а средбата беше спонтана, од оние средби кои од почеток имаат посебна енергија, и со тек на време стануваат сè посилни.

Во овие години со Андреј сме разговарале многупати на тема брак.

Тој секако знае дека јас обожавам лето и море, но моментот кога се случи запросувањето, беше апсолутно изненадување за мене.

Начинот на кој го организираше интимно, внимателно и со наши најблиски пријатели, навистина не го очекував, бев позитивно изненадена.

Бевме со наши најблиски пријатели на пловидба со катамаран низ Јонското Море, а во моментот на запросувањето бевме пристигнати на Закинтос, на познатата плажа Навагион, каде што сѐ и било испланирано.

Јас се спремив за фотографирање на преубавата тиркизна позадина, морето беше немирно, па едвај чекавме да се сликаме сите и да тргнеме во правец кон Кефалонија, меѓутоа во моментот додека се сликавме, еден од пријателите беше во позадина и го држеше транспарентот со натпис Dajana, will you marry me? (Дајана, дали ќе се омажиш за мене?)

Андреј ми кажа да се свртам, а околните бродови и јахти почнаа да свират, луѓето силно да аплаудираат.

Тој клекна и без посебен говор, само ме праша „Дали ќе се омажиш за мене?“ Силно одговорив „Да“, и почнав да ги поздравувам луѓето на околните бродови.

Добивме силна поддршка и аплауз и малку е да се каже дека бев воодушевена и преплавена од емоции од самиот момент.

Се смеев, па се  расплакав, од срце, со искрени емоции и срцето ми беше полно.

Прстенот ми е совршен - стилски и емотивно. Андреј го бирал заедно со кумот Иван, а двајцата ме познаваат многу добро, па прстенот е апсолутно во мој стил, како што сум го замислувала отсекогаш.

Андреј ми кажа дека бил многу возбуден пред запросувањето, но дека немал трема - сепак сѐ организирал знаејќи дека ќе се воодушевам, затоа што апсолутно секој чекор беше толку романтичен и точно онака како што некогаш сум замислувала.

За запросувањето најпрво им кажавме на нашите семејства.

Нивната радост и емоции беа непроценливи, а најмногу се израдуваа мајките, тие го доживеаја многу емотивно, како нешто што веќе долго го чекале.

Сѐ уште сме под импресии од запросувањето и засега е сигурно дека ќе организираме журка по тој повод, а потоа ќе почнеме и со подготовки за свадба, која што би сакале да е летен период, во кругот на нашите роднини и пријатели“.

©CRNOBELO.com Забрането преземање и копирање. Крадењето на авторски текстови е казниво со закон.

А. Ј. | Црнобело