Актерката Маја Илијевски доби навредлива порака за носот: „Зошто не го оперираш, малце е долг - во Турција има добри доктори?“

Детали

понеделник, 23 јуни 2025

„Деновиве добив навредлива порака за изгледот на мојот нос. Не сум од оние луѓе кои не се свесни за тоа кои се, како изгледаат, сум си ги прифатила сите мани. Но, овој пат нема да молчам - мојот нос не е проблем, проблем се луѓето кои сметаат дека е нормално да испраќаат такви пораки“ - вели актерката, по навредите за изгледот.

Актерката Маја Андоновска Илијевски, која каде и да се појави блеска со својата широка насмевка и шири позитивна енергија, овој пат беше жртва на сајбер-булинг.

Таа во порака на социјалните мрежи доби навредлива порака за својот нос, од личност која воопшто не ја познава.

Маја, реши дека не треба да молчи пред навредите, па ја сподели преписката со јавноста:

„-Оти не го напрајш носо операција?

Маја: А зошто да го направам?

-Па не гледаш дека малце ти е долг? Турција има добри доктори.

Маја: Јас немам проблем со тоа каков е мојот нос. Ниту сакам да ми е помал. Благодарам на грижата.

-Не знам, актерка во 2025 со такво размислување... прашај естетски хирург што ќе ти речи. Знаеш, не треба да е само глумата добра, туку и изгледот, естетиката. Остај ти што мислиш, гледај и цели од публиката. Поздрав“.

Ова беше доволна провокација за актерката да каже гласно што мисли, па објави видео на Инстаграм Стори.

„Деновиве добив навредлива порака за изгледот на мојот нос. Јас не сум од оние луѓе кои не се свесни за тоа кои се, како изгледаат, а и многу одамна сум расчистила со себе и сум си ги прифатила сите свои мани.

Но, овој пат нема да молчам и ќе зборувам гласно за сите кои се почувствувале помалку вредни поради навреда за нивниот изглед.

И, не, мојот нос не е проблем. Проблем се луѓето кои сметаат дека е нормално да испраќаат такви пораки.

Не се раѓаме да сме совршени. Се раѓаме да бидеме свои. Баш во тоа е целата убавина“ - раскажува Маја во видеото.

Тоа е дополнето со неколку фотографии направени од профил, а на кои фокусот е нејзиниот нос.

Покрај видеото Маја објави и порака дека не сака да е совршена по туѓа мерка:

„Совршено тело? Совршено лице? Совршена илузија.

Не сакам да бидам совршена по туѓа мерка. Јас сум доволна – баш вака!

Jас сум реална, искрена и своја. И многу горда на тоа!

Совршенството е прескапо, а јас не плаќам со самодоверба.

Зборувам гласно - Не дозволувајте туѓите зборови да ја дефинираат вашата вредност.

Не се раѓаме за да бидеме совршени по туѓи стандарди. Се раѓаме да бидеме свои“.

Кликнете и погледнете го видеото:

А. Ј. | Црнобело