Браво! Марко Пејчиноски го заврши триатлонот Ironman долг 107km - трчаше, пливаше и возеше велосипед и покрај болеста на колкот

Детали

петок, 29 август 2025

Охриѓанецот Марко Пејчиноски повторно нè направи горди. Тој синоќа (28.08) го комплетираше модифицираниот триатлонот Ironman, долг 107km, предизвик во кој трчаше скоро 8 часа, два и пол часа возеше велосипед и преку 9 и пол часа пливаше во Охридското Езеро.

Марко го постигна сето ова и покрај ретката болест на левиот колк, пертес, од која боледува веќе 9 години, a поради која му е отежнато одењето.

Но, исто како и низ минатото, кога како тинејџер го препливуваше Охридското Езеро, така и сега Марко не дозволи болеста да му биде пречка, напротив, храбро се соочи со секоја пречка на патот на комплетирање на предизвикот Ironman и успешно го заврши.

За сето ова време, неговиот тим, предводен од татко му и брат му, кои му се најголема поддршка во неговите подвизи, објавуваа видеа на Инстаграм и со следбениците на Марко споделуваа детали од неговиот пат.

Првиот дел од триатлонот беше трчањето, кое Марко го почна околу полноќ во Свети Наум, а траеше скоро 7 часа и 47 минути, кога пристигна на целта во Струга.

По ова продолжи возењето велосипед, а зацртаната рута ја комплетираше за 2 часа и 33 минути, за да заврши со препливување на Охридското Езеро, од Свети Наум до Охрид, подвиг за кој му требаа скоро 9 часа.

Пред почетокот на триатлонот, Марко се прекрсти пред иконите на Богородица, а се прекрсти и високо ги крена рацете и кога излезе од езерото на охридското пристаниште, по завршувањето на предизвикот.

Кликнете на видеата и погледнете гo патот на Марко до целта:

А. Ј. | Црнобело