Горди сме! Марија (22) од Богданци освои втора награда за моден дизајн од светскиот бренд Pierre Cardin

Детали

вторник, 07 октомври 2025

Македонија има талентирана младина! Марија Роглева од Факултетот за арт и дизајн од Скопје ја освои втората награда за модна креација од светскиот бренд Pierre Cardin и со тоа се пласираше во петте најдобри учесници, во конкуренција на 450 пријавени студенти од повеќе европски земји.

Марија Роглева (22) од Богданци е студент на Факултетот за арт и дизајн на Европскиот универзитет во Скопје, а 7 години активно се занимава со мода и уметност.

Марија пролетта учествуваше во работилницата од соништата во Париз, организирана од модната куќа Pierre Cardin, а сега со една од своите креации се натпреваруваше во финалето организирано од овој моден бренд, и во конкуренција на 13 најдобри млади креатори од Европа, го освои второто место.

Натпреварот се одржа во Атина, каде што беа претставени моделите само на тринаесетте најдобри млади креатори, кои со својата модна визија се издвоија на работилницата во Париз.

Во тоа време, Марија за CRNOBELO.com кажа дека не знае дали ќе влезе меѓу најдобрите и дека дури по неколку месеци учесниците од работилницата ќе знаат кои од нив се во финалето, закажано за октомври во Атина.

Но, Марија нè направи горди и со својата креација го освои второто место.

Веста за наградата на младата девојка ја споделија од нејзиниот Универзитет на Инстаграм.

Креацијата на Марија

„Во импресивниот амбиент на Божиќниот театар во Атина, пред многубројна публика во саботата навечер (04.10) се одржа големото финале на европската награда за млади модни дизајнери, под патронство на модната куќа Pierre Cardin.

Нашата студентка Марија Роглева од Факултетот за арт и дизајн ја освои втората награда и со тоа се пласираше во петте најдобри учесници, во конкуренција на 450 пријавени студенти од повеќе европски земји.

Тринаесетте финалисти се претставија со свои креации на заедничка модна ревија.

Тројцата добитници на првата награда ќе остварат четиримесечна пракса во студиото на Pierre Cardin во Париз.

Втората награда, која ѝ беше доделена на Марија и на уште еден учесник, се состои од статуетка и диплома.

Наградите на добитниците им ги додели лично Родриго Базиликати Кјарден, претседател на групацијата Pierre Cardin.

Во Атина Марија Роглева ја придружуваше проф. д-р Гордана Вренцоска, под чие менторство се правеа подготовките за финалниот настап.

Марија вели: „Среќна сум за својот постигнат успех, кој го доживувам како голема мотивација за иднината“.

За неа ова беше непроценливо искуство, преку кое се стекна со важни лекции за професијата моден дизајнер“, стои, меѓу другото, во објавата.

Прочитајте и Браво, Македонија има талентирана младина! Марија (21) од Богданци беше дел од работилница на Pierre Cardin во Париз

А. Ј. | Црнобело