„Одев на психијатар по разводот“ - Брејк искрен за некои од најтешките моменти во животот

Детали

четврток, 15 јануари 2026

„Одев често на психијатар посебно во процесот на развод поради детето, поради пристапот кон него, бидејќи синот мој имаше 8-9 години тогаш, беше силно развиено дете и одев за да знам што да очекувам, што да направам, како да возвратам, како да разговарам со него“ - вели Брејк во својата исповед.

Бизнисменот и, како што вели за себе ‘хонорарен пејач’, Дарко Гелев Брејк, беше гостин во емисијата „Животна приказна“ со Здравкица Милиќ.

Низ разговорот тој откри детали за своето детство кога живеел една година во Австралија со родителите, а потоа и една година во Грција со татко му, со кого бил премногу поврзан.

Татко му почина пред 10 години, а Дарко низ разговорот раскажа и за неговиот погреб, кога со музика го испратиле во вечното почивалиште.

„Многу го сакав. Болно го сакав татко ми. Со него имавме шега, ѝ кажувавме на мајка ми: ‘Лиле ти кога ќе починеш, ќе те испраќаме со музика’.

Кога тој почина, јас и Лиле одевме во поворка, со музика, имаше преку 200 луѓе, јас со солзи во очи, она со солзи во очи, и колку и да звучи чудно, ѝ викам: ‘Требаше обратно да биде’. И она се смее“, раскажува Брејк.

На прашањето дали некогаш има потреба од психолог или психијатар, тој вели: „Секогаш!“.

„Сите ние имаме потреба. Јас одев често посебно во процесот на развод поради детето, поради пристапот кон него, бидејќи синот мој имаше 8-9 години тогаш, беше силно развиено дете, му направивме jump start со тој наш развод.

Одев за да знам што да очекувам, што да направам, како да возвратам, како да разговарам“.

Тој вели дека било тешко да му се соопшти на синот Марко за разводот, иако со првата сопруга Драгана немале турбуленции и кавги.

„Едноставно многу млади се земавме. Чудно, и разводот ни беше некако детски се раздвоивме, немаше некои циркуси.

Но, имавме едно најубаво детенце направено заеднички, за кое двајцата и ден-денес треба да водиме сметка да биде океј со него. Така што, убаво е да се оди на психијатар“, рече Брејк.

Подоцна во разговорот, тој уште еднаш се наврати на темата посета на психијатар, па вели:

„Круцијално ми е моите 3 деца добро да живеат. Кога се разведов бев многу млад и честопати консултирав психијатар, не само поради менталното здравје на синот, не само да не влијае лошо разводот на него, туку, детево има потенцијал, дај да го развиваме тој потенцијал.

Што јас да направам како родител за тој потенцијал да излезе на виделина како што треба и фала му на Бога, втор факултет во Лондон запиша сега“.  

Брејк, кој наскоро ќе наполни 50 години, има три деца - синовите Марко (26) и Давид (12), и ќерката Деа (6).

Погледнете го целото интервју:

А. Ј. | Црнобело