Летното сметање на времето почнува викендов - Во недела ќе спиеме еден час помалку

Детали

петок, 27 март 2026

Летното сметање на времето почнува во последниот викенд во март, кога часовникот се поместува еден час напред, а трае до последниот викенд од октомври.

Летното сметање на времето во 2026 година почнува на 29 март во 02:00 часот, кога часовниците ќе се поместат еден час нанапред, односно - 03:00 часот.

Ова значи дека во недела, 29 март, деноноќието наместо 24, ќе има 23 часа.

Кога се поместуваат стрелките на часовникот нанапред, народот вели и дека „спиеме еден час помалку“ бидејќи и денот е пократок.

Целта на менувањето на часовникот од летно кон зимско сметање на времето, и обратно, е да се искористи дневната светлина и на тој начин да се заштеди потрошувачката на енергија.

Во последниве години многу земји апелираа да се укине летното сметање на времето, па поттикнати од тоа, во 2016 година Европската унија покрена иницијатива да се одреди едно време кое ќе биде унифицирано за сите држави на континентот, но безуспешно.

Причината што и понатаму нема договор е што едни земји инсистираат времето да се мери според „зимското сметање“, а други преферираат преку цела година да се задржи „летното сметање“ на времето.

Во јавноста со години се дебатира и за тоа дали промената на времето има влијание врз здравјето на луѓето.

Кога се поместуваат стрелките на часовникот, понапред или поназад, многу луѓе се жалат дека не се чувствуваат добро - дека се уморни и дека им се менува расположението.

Медицината нема конкретен став за оваа тема, иако постојат истражувања кои потврдиле дека на организмот му се потребни околу 15 дена за да се адаптира на промената.

А. Ј. | Црнобело