Мартина и Александар избрани за невеста и зет на Галичка свадба - Неговите родителите се венчале таму пред 35 години

Детали

петок, 27 март 2026

„Дополнителна симболика и тежина на нивниот избор дава фактот што оваа година се одбележуваат 35 години од првата современа Галичка свадба (1991), кога биле венчани родителите на Александар“, велат организаторите на манифестацијата.

Организаторите на Галичка свадба ги избраа невестата и зетот за 2026-та година - Александар Пендароски и Мартина Михајлова.

Тие ги соопштија нивните имиња и открија дека една од причините поради која што ги избрале е фактот што родителите на Александар пред 35 години биле првите младоженци на Галичка свадба, па на овој начин ја продолжуваат традицијата.

Во објавата на Фејсбук, пишува:

„По разгледување на сите пристигнати апликации и по навистина тешка одлука, Советот на Месната заедница Галичник со голема чест и задоволство ве информира дека за зет и невеста на Галичката свадба 2026 се избрани Александар Пендароски и Мартина Михајлова.

Годинава интересот беше исклучително голем, со повеќе квалитетни и искрени пријави, што ја направи одлуката особено предизвикувачка.

Она што особено се истакна во нивната апликација е нивната длабока и искрена поврзаност со Галичник – како место кое не го доживуваат само како традиција, туку како дом, спомен и животна припадност.

Дополнителна симболика и тежина на нивниот избор дава фактот што оваа година се одбележуваат 35 години од првата современа Галичка свадба (1991), кога биле венчани родителите на Александар.

За нив, ова претставува продолжување на една семејна традиција и длабока врска со корените.

Веруваме дека Александар и Мартина достојно ќе ја понесат честа да бидат зет и невеста, претставувајќи ја автентичноста, вредностите и духот на Галичник.

Им честитаме и им посакуваме многу среќа, љубов и достоинствено претставување на оваа вековна традиција. Да се ќердосает! Се гледаме во Галичник“.