Марија од Кичево живее во Хрватска и направи прв роденден за ќерката со тема лаванда: „Приказната зад ова е емотивна за нас“

Детали

среда, 24 јуни 2026

„Со сопругот сакавме трудничка фотосесија во полиња со лаванда, но се породив еден ден порано, па реков дека првиот роденден ќе биде во тој стил. За декорацијата се погриживме лично ние – јас, сопругот, мајка ми и сите останати дома. Сами купувавме, дувавме балони, спремавме и уредувавме со денови“ - вели Марија од Кичево за првиот роденден на ќеркичката во Истра, Хрватска. 

Марија Софрониеска Спасевска (27) Кичево, по струка e општа медицинска сестра, која пред да замине на породилно отсуство работела во Ровињ, а воедно е и професионален фотограф во Истра.

Таа и сопругот Иван се родители на Георгина, која неодамна наполни 1 година, а ѝ приредија роденденска прослава со тема во стилот на лаванда, која е препознатлива за краиштата во кои моментално живеат. 

За CRNOBELO.com Марија вели:

Пред три години, животот непланирано ни ги спакува куферите и нè донесе тука, во прекрасниот Медулин во Хрватска. Дојдовме сосема случајно, без некој голем план, но патот си го направи своето и Истра стана нашиот моментален дом каде се роди и нашето најголемо богатство – ќеркичката Георгина (во блиската Пула).

Заедно со мене во оваа авантура е и мојот сопруг Иван (33) од Куманово, кој професионално раководи со менаџирање во угостителството и храната.

Иако моментално градиме убав живот тука, сепак носталгијата по дома е секогаш присутна, па во нашите долгорочни планови е можеби за неколку години повторно да си ги спакуваме куферите и да се вратиме во Македонија, поточно во Куманово“.

За роденденот на ќерката, тие го украсиле просторот во боја на лаванда, а дури и стајлингот на тричленото семејство е модно усогласен со темата. 

За идејата за прославата, Марија ја раскажува приказната за CRNOBELO.com:

„Приказната за идејата околу декорацијата и самиот концепт за роденденот е навистина посебна и емотивна за нас.

Имено, само една недела пред да се породам, со сопругот планиравме да направиме трудничка фотосесија во прекрасните полиња со лаванда.

Истра во периодот од јуни до јули целата мириса на лаванда, а јас како фотограф едноставно се заљубив во тој колорит и амбиент.

Сепак, плановите ни се променија на најубавиот можен начин – Георгина реши да нè изненади и се роди еден ден пред терминот, па така не успеавме да ја дочекаме и реализираме таа фотосесија.

Тогаш му реков на сопругот: „Штом не успеавме, тогаш, нејзиниот прв роденден ќе го обоиме и прославиме токму во тој стил!

Прославата ја организиравме во ресторанот Blue Lagoon, лоциран на самата плажа на полуостровот Помер кај Медулин.

Го избравме овој ресторан бидејќи сакавме амбиент кој ја отсликува убавината на морето и природата каде што живееме, а близината на водата и лежерниот медитерански дух дадоа посебна магија на целиот ден.

Како креативец, имав желба визијата за лаванда-темата да ја преточам во реалност со помош на најблиските.

За декорацијата се погриживме лично ние – јас, сопругот, мајка ми и сите останати дома. Сами купувавме, дувавме балони, спремавме и уредувавме со денови.

Секако, морам да упатам огромна благодарност и секоја чест до прекрасниот персонал од ресторанот, кои ни излегоа во пресрет за сè и ни помогнаа да го реализираме секое замислено катче.

Продолжува на следната страница...