АИЕСЕК - 60 години традиција во Македонија

Детали

петок, 07 јуни 2013

Да се одбележи 60 години постоење е доказ за успешната приказна на една од организациите со најдолга традиција во Македонија – АИЕСЕК.

60 генерации млади луѓе на кои АИЕСЕК успеал да им го промени животот, оставајќи белег на нивната младост. Секој од нив би потврдил дека искуството и миговите минати во организацијата се нешто кое не се заборава. Пријателствата склопени за време на тоа патување се пријателства кои ќе траат вечно, а сеќавањата од сите предизвици со кои се соочиле заедно ги прават истите уште подрагоцени.

Да се биде дел од едно големо интернационално семејство е можност да се види светот со други очи, одблиску да се запознаат разновидни култури и да сфати улогата и моќта која ја има секој од нас во ова глобално село.

Всушност вредностите и визијата на организацијата кои успеале да останат исти сиве овие години, се поттик кој истата ја води напред, сплотувајќи ги сите нејзини членови во една моќна движечка сила.

Преку своите програми, проекти и активности, АИЕСЕК им нуди можност на младите луѓе да направат позитивна разлика во своето опкружување. Но истотака и да ги направи да се чувствуваат горди на промената која ја направиле, свесни за заслугата која ја имаат. Сето тоа им овозможува да се надградат себеси, прераснувајќи во совесни и одговорни млади индивидуи.

Во овие 60 години докажавме дека АИЕСЕК позитивно влијае на младите луѓе, па затоа да си посакаме среќа за уште поголема успешност во наредните години и за развивање на лидерскиот потенцијал кај младите во Македонија.

Среќен роденден АИЕСЕК во Македонија!