Повеќе од 30 музичари одржаа ненадеен новогодишен концерт сред „Веро Центар“

Детали

четврток, 31 декември 2015

Тие го почнаа настапот излегувајќи од различни страни во трговскиот центар во стилот на „флеш моб“, а репертоарот беше составен од композициите Silent night, Jingle Bells, дела од Штраус итн.

Посетителите на „Веро Центар“ викендов беа пријатно изненадени од ненадеен настап на гудачки оркестар составен од музичари од Македонската филхармонија и Македонска опера и балет и од професори и ученици од ДМБУЦ „Илија Николовски - Луј“. Излегувајќи од различни страни во трговскиот центар во стилот на „флеш моб“, тие го почнаа 30-минутниот концерт, а репертоарот беше составен од новогодишни композиции како Silent night, Jingle Bells, дела од Штраус како и од популарниот анимиран филм Frozen.

 Оркестарот беше предводен од професорката по виолина, Наташа Малиновска, а диригент беше маестро Ерхан Шукри. Настапот го почнаа 15-ина професионални музичари од филхармонија, МОБ и професори, а во вториот дел им се придружија и 20-ина млади изведувачи кои се членови на детскиот оркестар на ДМБУЦ „Илија Николовски - Луј“.

- Ова беше одлична шанса за да се афирмира класичната музика, но и да се придонесе за уште поубава атмосфера и предновогодишно расположение во градот. Воедно учениците имаа можност да настапат заедно со поискусни и постари колеги што секако е убаво искуство – вели Малиновска.

Посетителите на „Веро Центар“ направија пауза од шопингот уживајќи во ненадејниот концерт. „Пријатно изненадување“ и „Уживање сред неделните обврски“, беа само дел од коментарите на публиката на овој несекојдневен музички настан. Маркетинг менаџерката Љубица Короскоска посочува дека ваков тип на случувања и во иднина ќе се организираат во трговскиот центар.

- „Веро Центар“ е место за шопинг, но и за квалитетно поминато време за секој потрошувач. Уште од самиот почеток нашата мисија е пријатно да ги изненадуваме купувачите и да им го направиме денот поубав. Позитивните реакции ни се стимул да продолжиме и понатаму со ваквиот тип на настани, но и да бидеме уште подобри во тоа што ќе им го понудиме на нашите посетители – вели Короскоска.

Во „Веро Центар“ изминатиов период се чувствуваше новогодишниот дух и покрај ненадејниот концерт, посетители уживаа и во детската претстава, празнични настани како и во големиот број на попусти и специјални понуди.