Министерот Венко Филипче од денес е во домашна изолација по контактот со кумановскиот градоначалник

Детали

четврток, 16 април 2020

По веста дека градоначалникот на Куманово е позитивен на КОВИД-19, а со кој, министерот за здравство беше во контакт, Филипче објави дека ќе биде во домашна изолација.

Министерот Венко Филипче се огласи по повод контактот кој го оствари со кумановскиот градоначалник, Максим Димитриевски, кој е позитивен на корона вирусот.

Тој соопшти дека од денес ќе биде во домашна изолација, а во исчекување е на епидемиолошки анкети кои ќе бидат направени со него, како и со други функционери од Владата.

Погледнете го целосното соопштение:

Почитувани граѓани,

По информацијата дека градоначалникот на Куманово, Максим Димитриевски кој вчера одржа состанок на кризниот штаб на Куманово на кој присуствував и јас, е позитивен на Ковид-19, од денеска ќе бидам во домашна изолација. На состанокот ги почитував сите протоколи за заштита и носев заштитна опрема исто како и останатите присутни.

Ги очекувам епидемиолозите од Институтот за јавно здравје кои освен со мене, ќе направат епидемиолошки анкети и со сите други функционери во Владата кои вчера беа присутни на состанокот. До добивање на епидемиолошка проценка на ризикот и насоки за понатамошно постапување останувам во изолација.

Ние го имавме предвид и се подготвуваме и за ова сценарио. Работата на Министерството за здравство продолжува да се одвива непречено, а јас и од изолација останувам во редовна комуникација со комисијата за заразни болести и сите останати инволвирани во овој процес и продолжувам да ги координирам сите процеси во справување со кризата.

Како и досега, Министерството за здравство редовно и навремено ќе информира за состојбата со коронавирусот во земјата, а прес-конференциите ќе ги правиме преку достапните онлајн платформи за оваа намена. Во текот на денот ќе се воспостави техничка можност за ова за да нема застој во однос на информирањето.