Александар Илиевски со пливање го заобиколи Охридското езеро: „Имаше силен ветер и бранови, но успеав да се изборам“

Детали

среда, 04 август 2021

„Со овој подвиг си докажав дека со упорна работа, посветеност и желба може да се постигне сè во животот“ – напиша меѓу другото Александар Илиевски откако го реализираше сопствениот подвиг и со пливање го обиколи Охридското езеро.

Александар Илиевски по повод големиот македонски празник Илинден направи вистински подвиг – со пливање го обиколи Охридското Езеро. Нашиот маратонец е првиот пливач што успеал да направи ваков подвиг.

Станува збор за рута долга 71km. Односно, преку Св.Наум-Подградец-Струга, тој успеа да стигне до Охрид за време од 15 часа 21 минута 38 секунди.

Подвигот го започна во 3.00 часот наутро од градското пристаниште во Охрид.

Како што вели, условите за пливање не биле сјајни - имало силен ветер, струи и бранови кои го враќале назад, но, некако успеал да се избори со нив.

„Со овој подвиг си докажав дека со упорна работа, посветеност и желба, но и да се сака - може да се постигне сè во животот. Се надевам дека со овој подвиг ќе ги мотивирам идните генерации да се осмелат на вакво нешто, затоа што имаме преубави Езера во нашата Македонија кои можеме да ги искористиме со вакви манифестации. Спортски поздрав до сите!!!“ – напиша тој во објавата.

Инаку, Александар Илиевски е наш репрезентативец и член на Македонската пливачка федерација. Тој досега освоил повеќе медали за далечинско пливање.

Повеќе фотографии од подвигот во продолжение:

Б. С. Б. | Црнобело