Русинка со импресии од Македонија: „Охрид е магичен град – фотографиите не ја доловуваат убавината“

Детали

среда, 17 ноември 2021

„Додека сум овде, сè што ме измачувало претходно го губи значењето, се чини празно и безначајно“ – вели Русинката Кристина која неодамна била во посета на Македонија.

Русинката Кристина која на Инстаграм објавува содржини на нејзиниот профил @fermiparadox сподели повеќе фотографии од убавините на Македонија.

Кристина е воодушевена од убавината на Охридското Езеро, од Кањонот Матка, а сподели и фотографии и видеа од скопската тврдина Кале.

„Охрид… магичен град! Немам зборови за да опишам колку е неспоредлив! И нема ниту една фотографија што во целост може да ги опфати овие прекрасни, луди пејзажи што ве оставаат без здив! Додека сум овде, сè што ме измачувало претходно го губи значењето, се чини празно и безначајно.

Само седиш, ја слушаш тишината, пеењето на птиците, звукот на ветрот, се воодушевуваш на тоа што те опкружува во моментот и чувствуваш спокојство и среќа од фактот што можеш да го видиш, да го слушнеш и воопшто да бидеш тука“ – напиша таа до фотографиите од Охридското Езеро.

Од споделените фотографии може да се види дека била во посета на кањонот Матка и на Скопје.

„Многу убав кањон со името Матка во долината на реката Треска. Единственото место што вреди да се посети во Скопје“ – вели Кристина.

„Во основа Охрид е едно од најстарите населени места во Европа, за првпат се споменува дека датира од 3-иот век пред новата ера (но, тогаш бил нарекуван Лихнид), а Охридското Езеро е едно од најстарите на планетата Земја. Неговата старост според научниците е најмалку 5 милиони години! Во 1980-та година Охрид и Охридското Езеро биле вклучени во листата на УНЕСКО“ – појаснува таа.

Погледнете повеќе нејзини фотографии во продолжение:

Б. С. Б. | Црнобело