Жена заборавила 35.000 денари на банкомат во Скопје, благодарна на човекот што ѝ ги врати - доказ дека сѐ уште постојат чесни луѓе

Детали

вторник, 04 октомври 2022

Што би направиле вие ако најдете 35.000 денари на банкомат? Објавата на социјалните мрежи на оваа жена е доказ дека сѐ уште има чесни луѓе, што не сакаат туѓата несреќа да ја искористат во своја полза. Таа е благодарна на човекот што ги нашол парите и веднаш ѝ ги вратил.

Сите се радуваме кога ќе слушнеме дека некоја тажна приказна добила среќна разрешница, а во време на големи финансиски трошоци кога секој денар е важен, и сите се бориме за сопствената егзистенција, приказната на оваа жена ни ја враќа надежта дека сепак во Македонија сѐ уште има чесни и добри луѓе.

Пред неколку дена, во Фејсбук групата Женски домаќински муабети беше објавена една молба од жена на која ѝ се слошило додека вадела пари од банкомат, па заборавила 35.000 денари:

„Добар човеку ти што денес на банкоматот на Стопанска банка во Порта Влае најде и зема 35.000 денари, се надевам ќе бидеш хуман и добар да ги вратиш, особата која што ги вадела парите во моментот се избезумила ѝ се слошило и не знае како се случило што се случило, кога се вратила било касно веќе.

На оваа криза денеска фер е да бидеме хумани, Господ на доброто со добро враќа, ќе бидете наградени ве молам само да го вратите. На едно дете лебот од уста му го земавте.

Сѐ уште се надеваме дека човечноста не е умрена кај нас и дека баш некој таков добар и чесен човек ги има земено“ – стоеше во објавата.

Подоцна објавата беше дополнета со информација дека парите на жената ѝ биле вратени.

„Парите се вратени од господинот што ги нашол, Господ здравје да му даде и само убавини низ животот да има“ – стои во текстот.

Во коментар под објавата жената појаснува дека човекот што ги нашол парите ги однел во банката и побарал да ѝ бидат вратени на жената.

Друга жена пак, вели дека се нашла во таква ситуација да најде пари на банкомат, но наместо да ги однесе во банка се обидела да го најде сопственикот преку социјалните мрежи, па за 10-тина минути успеала да ја најде жената и да ѝ ги врати парите.

Што би направиле вие ако најдете толку пари на банкомат?

Б. С. Б. | Црнобело

фото: depositphotos.com