Вирален статус на Македонец: Именден на времето (скромна трпеза) vs. денес (масата како оригами изложба)

Детали

вторник, 20 декември 2022

„Именден денес - има виски за тој роднината од партија што очекуваш да те вработи, а нема. Масата е како оригами изложба. Печеница виткана како ружи, кашкавал во форма на лотосов цвет, салфети како лебеди, па мислам само куленот остана да личи на кулен...“

Божидар Божиновски е познат по шеговитите Фејсбук статуси, во кои често на хумористичен начин доловува реални ситуации.

Сега, тој посвети објава на имендените и славите, како изгледале некогаш, а како денес.

Неговиот статус, кој стана вирален на Фејсбук:

Именден на времето:

- домашно вино, домашна ракија, да знаевме и пиво да праевме ќе праевме

- немаше посна и мрсна слава пошто масата изгледаше ко президиумот на КПЈ, сите комунисти

- теми на расправа: втора светска војна (секогаш имаше партизан шо одбива да умри, а цела фамилија го чекаат да му јадат боречката пензија), фабричките гиганти на Југославија, Германија и Ватикан дале три милијарди марки да ја растурат Југославија, транзиција

- пошто седевме поделени ко во џамија жените идеа со тефтери „Југометал 90“ и менуваа рецепти, а пошто имаше и ageism посебно место имаше за децата

- никој не носеше дрвена лептир машна

- се слушаше музичка програма на локална телевизија дур не запее некој... обично тој што не знае да пее

Именден сега:

- исти пијачки, за 20 години не научивме уште пиво да прајме, а заборајвме да прајме вино и ракија. Плус има виски за тој роднината од партија шо очекуваш да те вработи, а нема

- масата е ко оригами изложба. Печеница виткана ко ружи, кашкавал во форма на лотосов цвет, салфети ко лебеди, јебем ли га само куленот остана да личи на кулен

- на маса се разговара исклучиво за геоплитика со две струи: прозападна и проруска. Се откриваат сите тајни на ЦИА, КГБ, Мосад без да се пази дека и ѕидовите имаат уши. Како почнува да дејствува алкохолот се спушта нивото на разни партии се дур хипикот на маса не речи „Сите се исти“. Никој не го слуша. Дискутираат и жени и деца пошто го победивме и патријархот и ageism-от

- во зависност на примањата на семејството музиката варира од Јутуб до жива музика. Уште се слуша Дугме

- од рецепти се разговара само за рецепти за лекови

- има луѓе со дрвени лептир машни, ко да немаат огледала

С. С. | Црнобело