Борко Ристовски за татковството: „Маж што никогаш не сменил пелена на детето или не му спремил млеко - ја нема мојата почит“

Кој е најголемиот гаф што си го направил како татко?

Морам да признаам дека не сум имал некои гафови што се однесува на моите деца. Дури и не се сеќавам на некој. А сега, што се однесува до животни гафови, е за тоа ќе ни требаат три интервјуа.

Колку од својот карактер препознаваш во карактерот на Душан, бидејќи Анастасија е уште мала?

Ова е веќе сериозно прашање. Душан е копија на мене. Карактерно сме буквално исти и тоа го покажува уште од сега. И морам да признаам дека се гордеам со него.

Се гордеам бидејќи има храброст да се бори за она што го сака и тоа го прави на неполни 5 години.

Со Душан, како и со мене, нема шанса нешто да направите на сила, да му викнете и да ве послуша. Ако не го изберете начинот на комункација да биде со разговор и по мирен пат, поинаку не може да излезете на крај.

Така што, баш ми е драго што тој ги има тие некои мои, ајде да ги наречам, борбени карактеристики.

А на кого личат повеќе, на тебе или на Нина?

Иако Нина упорно се самоубедува, а и пробува да ги убеди сите наоколу дека Душан личи на неа, мислам дека е повеќе од јасно и сите го кажуваат тоа дека е копија на мене.

Анастасија подличува на мене, меѓутоа кога е таа во прашање, би сакал да личи на Нина. Јас и немам баш некои изразито убави женски црти.

Кој ги бираше имињата на децата? Колку се слушаше твојот глас?

Ние секогаш кога сме разговарале сме доаѓале до заклучок дека имињата што ќе им ги дадеме на децата треба да имаат некакво значење, да не бидат некакви си модернистички без суштина.

Кога се работи за Душан,тој е крстен по мојот починат татко и беше моја желба која Нина одма ја прифати, за што сум ѝ благодарен, бидејќи многу ми значи. Додека за Анастасија, Нина беше во предност околу името.

Морам да признаам дека размислувавме за едно име, но сплет на околности, па се одлучивме за Анастасија оти се роди на големиот празник Св. Атанасиј, па затоа и одлучивме тоа да биде нејзиното име.

©CRNOBELO.com Забрането преземање и копирање. Крадењето на авторски текстови е казниво со закон.

А. Ј. | Црнобело