Серијата „Сабја“ е посветена на атентатот врз Ѓинѓиќ од 2003-та година: „Не сакавме да го прикажеме како светец“

„Не сакавме да зборуваме за некој спасител. Еден дел од Србија го идеализира Зоран Ѓинѓиќ, а друг го смета за предавник. Не сакавме да го претвориме во Исус Христос“ – велат авторите на серијата „Сабја“ која зборува за атентатот на српскиот премиер.

Во сите српски медиуми деновиве топ тема е почетокот на емитувањето на новата мини-серија „Сабја“ која е инспирирана од атентатот на поранешниот српски премиер Зоран Ѓинѓиќ и акцијата што следуваше потоа во која беа уапсени голем број познати личности, меѓу кои и фолк дивата Цеца Ражнатовиќ.

Серијата има вкупно 8 епизоди, на филмскиот фестивал во Кан ја доби наградата за најдобар актерски тим, а се чини дека во Србија и регионот, по првите две емитувани епизоди се отворија голем број стари рани.

Серијата го носи името на полициската акција која се спроведуваше од властите во Србија, „Сабја“, во која беа уапсени 11.665 лица, меѓу кои Цеца и Аца Лукас.

„Постојат толку теории на завери околу ова убиство. Еден пријател ме праша:

‘Како ќе ја направиш оваа серија?’

Во Србија не можете да најдете двајца луѓе што се сложуваат околу она што се случи со премиерот.

Ни требаше да воспоставиме одговорен однос кон вистината, но и да се дистанцираме и да кажеме: ‘Сметаме дека вака се случи’.

Исто така не сакавме да зборуваме за некој спасител.

Еден дел од Србија го идеализира, а друг го смета за предавник.

Не сакавме да го претвориме во Исус Христос – сакавме да покажеме сложен човек кој има маани. Носеше некои радикални одлуки, но за нив презеде одговорност“ – изјави еден од авторите на серијата, Владимир Тагиќ.

Серијата е сконцентрирана на настаните што му претходеле и што следувале по кобниот 12-ти март 2003, кога Ѓинѓиќ бил убиен пред зградата на Владата на Република Србија во Белград.

Додека земјата тоне во хаос и во неа е прогласена вонредна состојба, Даница, младата новинарка се обидува да ја истражи заднината на атентатот, а Борис, полицискиот инспектор, полека ги открива пропустите во рамките на истрагата, откривајќи огромен синџир на корупција.

Од друга страна, публиката има можност да го види младиот криминалец Урош, кој сѐ подлабоко навлегува во активностите на криминалниот клан кој го извршил атентатот, и сѐ потешко може да најде начин да излезе.

Улогата на Зоран Ѓинѓиќ ја толкува актерот Драган Миќановиќ, улогата на новинарката Даница ја толкува Милица Гојковиќ, Љубомир Бандовиќ е полицаецот Борис, додека Лазар Тасиќ ја толкува улогата на криминалецот Урош.

Во серијата се појавува и Сергеј Трифуновиќ кој ја толкува улогата на криминалецот Милорад Улемек Легија.

Во време на војните од 90-тите години, Легија бил командант на паравоената единица на доброволната гарда на Жељко Ражнатовиќ Аркан, а подоцна станал командант на Единицата за специјални операции во Ресорот на државната безбедност во српското МНР, кое учествувало во атентатот врз Ѓинѓиќ.

Прекарот го добил заради тоа што бил дел од француската Легија на странци.

Легија беше осуден на максимална затворска казна од 40 години и се смета дека тој бил нарачател на атентатот врз Ѓинѓиќ.

Сѐ на сѐ, се очекува ова да биде серија што ќе им се допадне на сите оние што сакаат да гледаат политички трилери, иако во Србија и во регионот првите две епизоди ја разбрануваа јавноста и ги навратија на периодот пред 21 година.

Б. С. Б. | Црнобело