Серијал од две книги од Колин Хувер кој нема да ви даде мир додека не го завршите

Два романи за жената која се соочува со семејно насилство и која се обидува да ѝ даде шанса на вистинската љубов, но истовремено да ја „заврши“ генерациската траума која се пренесува од колено на колено. Ако мајката била жртва, тоа не значи дека и ќерката треба да трпи, туку напротив, треба да стане посилна и да се спротивстави.

Колин Хувер во моментов е една од најпознатите светски писателки на романтични и љубовни романи во светот, но и кај нас, а нејзините обожаватели од целиот свет се израдуваа од фактот што наскоро ќе се снима и филм според нејзината книга „Ова завршува со нас“ со Блејк Лајвли во главната улога.

Засега не се знае кога филмот ќе биде објавен и колку ќе ја следи книжевната приказна, па затоа е добро да ги прочитате книгите за да знаете што би можеле да очекувате.

Секој љубител на книгата ќе ви каже дека книгите секогаш се поопширни и поинтересни за читање од филмовите, а за наша среќа, серијалот од две книги на Колин Хувер „Ова започнува со нас“ е преведен и достапен на македонски јазик.

Станува збор за одличен серијал, кој од една страна има одлична феминистичка порака, но од друга страна изобилува и со еротски сцени кои ќе ви ја заскокоткаат фантазијата и имагинацијата.

„Ова завршува со нас“

Романот „Ова завршува со нас“ оригинално беше објавен во 2016-та година во САД, а освен што изобилува со романтични и еротски сцени, носи и една важна одлука за тоа како жената треба да се справи со семејното насилство и кога првите знаци се показател дека нешто не е во ред во врската.

Лили штотуку дипломира на факултет и се сели во Бостон со надеж дека наскоро ќе отвори своја цвеќарница таму.

Сосема случајно го запознава неврохирургот Рајл Кинкејд, со кого брзо одлучува да стапи во брак иако кај него почнува да ги забележува знаците што толку долго ги гледала во односот помеѓу татко ѝ и мајка ѝ, која долги години трпела насилство.

Сосема случајно, во животот на Лили се враќа и нејзината прва љубов, Атлас, што само дополнително ќе ги искомплицира работите.

„Ова почнува со нас“

Продолжението на мега хитот „Ова завршува со нас“ беше објавено во октомври 2022-ра година и веднаш стана хит.

Овој роман продолжува токму онаму каде што заврши претходниот, односно со средбата помеѓу Лили и Атлас, во периодот кога нејзината ќерка има 11 месеци.

Овој роман е раскажан од перспектива на Лили и на Атлас, а ја раскажува нивната приказна додека се обидуваат да ѝ дадат втора шанса на љубовта, иако се под постојан притисок од нејзиниот љубоморен бивш сопруг.

Б. С. Б. | Црнобело