3 романи за роматични души што ќе ве разнежнат пред Валентајн

Во пресрет на Денот на вљубените, зошто да не прочитате еден, или можеби сите три љубовни романи, кои ќе ве разнежат и расположат?

Овие лесни четива се читаат во еден здив, а вие ќе се заљубите во главните ликови и ќе се поистоветите со нивната приказна.

Уште малку љубов пред Валентајн не е на одмет, нели?

„Слаткоречив туѓинец“ - Лиса Клејпас

Џек е безгрижен милионер од Тексас со нескротлив дух. Ужива во животот, во друштвото на убави жени и не сака обврски, па не им дава никакви ветувања на жените кои ги љуби.

Но, сето тоа се менува кога на неговата врата се појавува жена со бебе во рацете.

Таа е тетка на бебето и тврди дека Џек е неговиот татко. Мајката го напуштила и грижата за него ја препуштила на својата поодговорна сестра. А таа, знаејќи кој е таткото, бара од Џек да преземе одговорност за својот син.

Запознавајќи ги бебето и неговата тетка, Џек знае дека мора да преземе одговорност. И некаде помеѓу грижата за детето и караниците со тетката, тој почнува да се вљубува.

„Погодокот“ - Ел Кенеди

Али е обична девојка која наскоро ќе дипломира, но не знае што сака да прави потоа во животот. Таа се плаши дека ништо нема да ѝ тргне од рака, зашто освен што има проблеми со самодовербата, не ѝ оди ни во љубовта, откако раскина долгогодишна врска.

Али знае дека секс без обврски не е решение за нејзините проблеми, но не може да му одолее на згодниот хокеар Дин, со кого сака да помине само една ноќ.

По ноќта заедно, Дин сака да продолжат да се гледаат, но Али му нуди само пријателство, а тоа го излудува.

Научен е да добива сè што ќе посака и не му се допаѓа нејзиното одбивање. Затоа решава дека ќе ја освои по секоја цена, а потоа ќе ја остави... Но, работите не одат секогаш по план...

„Ослободување“ - Али Мартинез

Теа и Ремзи се другари од детството. На 13 години првпат се бакнале, на 16 станале момче и девојка и почнале да планираат заедничка иднина.

Но, на 17 години, Ремзи завршува во затвор, осуден за убиството на момчето што ја силувало Теа.

Од неа бара да го заборави, и ѝ испраќа писмо во кои ѝ пишува дека веќе не ја сака. Но, Теа не се откажува од него.

По 12 години, таа го чека да излезе низ затворските порти и да го види 29-годишниот маж кого, всушност, не го ни познава.

А. Ј. | Црнобело