Ружица од Скопје: „Имам библиотека од 400 книги, читам во автобус на пат кон работа - Кои ми се омилени?“

„Ленинградска зима“ од Кристин Хана

Ова е книга за едно семејство, неговите тајни и идентитет.

Приказната ги следи Мередит и Нина, две многу различни сестри, кои се враќаат заедно во домот кога нивниот татко умира.

Неговата последна желба е да ја слушнат бајката која нивната мајка им ја раскажувала кога биле деца.

Ања, нивната мајка имала многу тежок живот исполнет со страв, загуби и преживување, што ја прави дистанцирана, ладна и емоционално исклучена.

Таа крие тајна болка, а Мередит и Нина се обликувани од таа исчезната приказна.

Како што се одвива приказната, станува очигледно дека тоа не е само бајка раскажувана во детството - тоа е длабоко лична приказна за минатото на Ања во воено разурнатиот Ленинград (за време на Втората светска војна) и како таа опсада го обликувала нејзиниот живот и ѝ оставила лузни кои не зараснуваат.

Сепак на крајот книгата води до исцелување, помирување и зближување на мајката и ќерките.

„Избриши ги солзите“ од Линда Хауард

Ова е моќен роман за суровата пресвртност на судбината и загубата, неизвесност за љубовта, нескршливата решителност и надежта што одбива да умре.

Започнува со крик на мајка кој ја кине душата и никогаш навистина не завршува.

Животот на Мила Еџ се распаѓа кога нејзиното бебе е киднапирано директно од нејзините раце на преполна мексиканска улица.

Но, таа нема да запре пред ништо и 10 долги години одбива да се откаже, станувајќи неуморен застапник за исчезнатите деца.

Кога конечно се појавува трага, Мила се здружува со опасен и мистериозен човек по име Дијаз, чиј опасен свет го држи клучот за нејзината потрага.

Тој живее во сенки, но неговите вештини се чинат како единствениот начин преку кој Мила може да го врати синот дома.

Заедно, тие откриваат корупција и шокантни вистини што ја тестираат нејзината храброст и издржливост.

Тука е претставена силата и незапирливоста на една мајка, искована во тага, гнев и оган, мајка во постојана борба со правдата и одмаздата, вистината и предавството, преминувајќи секакви граници само за да го најде своето изгубено дете.

Но, тука е прикажана и нејзината несебичност и емпатија, бидејќи и покрај болката која ја носи, таа им помага и на други семејства да ги пронајдат своите киднапирани деца.

На крај, Мила повторно открива како да сака, да верува и да живее повторно, иако за среќата на своето дете ќе се откаже од својата.

Ова е фасцинантен трилер за тоа колку далеку ќе оди една мајка за да го заштити своето дете, без оглед на цената.

„Ова завршува со нас“ од Колин Хувер

Книгата е дуологија, а ова е првиот дел, но не е само романса или љубовна приказна, туку станува збор за сила, кршење и учење како изгледа вистинската љубов.

Лили Блум е паметна, независна и се обидува да изгради нов живот во Бостон.

Тука го запознава и се заљубува во Рајл, неврохирург, маж кој е шармантен, брилијантен и комплициран. Нивната хемија е електрична, а нивната љубов страсна.

Но, како што нивната врска се продлабочува, таа почнува да гледа духови од минатото на своите родители и е принудена да ги донесе најтешките одлуки.

Рајл е всушност ист како нејзиниот татко, и го носи истиот вид насилство за кое таа цел живот вели дека нема да го прифати, воедно обвинувајќи ја својата мајка за сè што трпела.

Оваа романса ни покажува колку е комплицирано кога вашето срце и ум ве влечат во спротивни насоки, и на моменти не можете да знаете што е правилно, а што не.

Но, преку силата на Лили учиме и гледаме како да кажеме „не“ и „доста“ на насилството, и како да се избереме себеси, со храброст и љубов кон себе.

Иако насловот вели „завршува“, всушност тоа означува дека лекувањето почнува, дека почитта кон себе победува.

Пораката не е само поттик за напуштање на токсична врска; туку и за разбирање дека кога заминуваме всушност храбро започнуваме.

Книгата не е само фикција, туку е огледало за секој што морал да се избере себеси откако бил повреден.

Во продолжението, „Ова започнува со нас“, Лили е повторно силна, сама со своето дете.

А животот повторно ѝ го враќа Атлас, пријателот и љубовта од детството.

Тука започнува исцелувањето, каде љубовта се враќа во својата најнежна форма, трпелива, љубезна и безбедна.

©CRNOBELO.com Забрането преземање и копирање. Крадењето на авторски текстови е казниво со закон.

А. Ј. | Црнобело