Андриана од Битола: „Имав библиотека од 1.000 книги, пола морав да ги раздадам - Кои 5 ми се омилени?“

„Оркански височини“ од Емили Бронте

Ова е готска и незаборавна приказна за љубовта, опсесијата и одмаздата.

Преку сложениот однос помеѓу Кетрин Ерншо и Хитклиф, Емили Бронте напишала роман што и денес ги освојува читателите со својата емоционална сила и мрачна атмосфера.

Ова е книга која те остава со нежна меланхолија. Ја обожавам со целото мое срце!

„Солзотворец“ од Ерин Дум

Книгата нè носи во свет исполнет со тајни, легенди и емоции.

Кога Ника конечно го напушта сиропиталиштето Грејв, верува дека ги остава зад себе сите стравови од детството.

Но, минатото не исчезнува така лесно, особено кога е врзано за Ригел - момче кое истовремено ја привлекува и ја плаши.

Ова е приказна за љубовта, болката и исцелувањето.

Една од оние приказни кои навестуваат идни препрочитувања за да се навратите на сите поуки, пораки и прекрасни цитати. Книга која ќе ве допре како ниедна друга.

„Крадецот на бакнеж“ од Л. Џ. Шен

„Крадецот на бакнежи“ е современа романса исполнета со интриги и опасни игри на моќ.

Франческа Роси живее живот кој другите го контролираат, сè до моментот кога на нејзиниот пат се појавува сенаторот Вулф - човекот што најмногу треба да го мрази.

Она што започнува како присилен однос полн со недоверба и судири постепено прераснува во нешто многу посложено.

Роман кој совршено ги спојува забранетата љубов, семејните тајни и борбата за сопствена слобода.

Приказна која ќе ве остави без здив и со растреперно срце, каде што со секое поглавје, Франческа и Вулф ќе ве вовлечат подлабоко во нивниот свет - свет каде страста и болката се испреплетени на начин што не се заборава.

Најтопла и мрачна препорака од мене!

„Атмосфера“ од Тејлор Џенкинс Рејд

Ова е приказна за соништата, науката и љубовта.

Кога Џоан Гудвин станува дел од НАСА, пред неа се отвора свет за кој отсекогаш сонувала.

Но, додека ја гради својата кариера и ги создава најважните пријателства во животот, се соочува и со чувства што не ги очекувала.

А една клучна мисија ќе ни покаже колку е тенка линијата помеѓу она што го планираме и она што ни го подготвува животот.

Ова не е книга која се чита со очите, туку со срцето.

Сите дела на Петре М. Андреевски

Петре зад себе оставил непроценливо богатство на македонската литература, кое треба да се чува и негува.

Неговите дела се длабоко вкоренети во македонскиот идентитет и, преку богат и моќен јазик, допираат теми како љубовта, страдањето, достоинството и човечката добрина.

Длабоката емотивност се чувствува на секоја страница, а преку неговото творештво тој успева да ги преточи животните дилеми и лекции.

Моралот, вредностите и добрината се ѕвезда водилка низ страниците на овој великан.

Дела што секој треба да ги прочита барем еднаш во животот.

©CRNOBELO.com Забрането преземање и копирање. Крадењето на авторски текстови е казниво со закон.

А. Ј. | Црнобело