ЉУБОВ на кориците - 3 книги кои ќе ве исполнат со нежни чувства

Љубовта, вечна тема, неицрпна инспирација и опсесија на писателите си го пронајде патот во овие 3 книги кои ви ги препорачуваме за читање.

Студеното време има способност да нè направи тмурни и по малку тажни, но страниците исполнети со љубов несомнено ќе ви го стоплат срцето.

Време е за ЉУБОВ, испишана во следниве облици:

Љубов во ранетата земја – Џин Сасон

Џоана Ал-Аскари е главната хероина во овој исклучителен роман кој го отсликува страдањето и геноцидот на Курдите. Базиран според вистинска приказна, Џоана е упорна, по малку тврдоглава и храбра млада жена, која се бори за слобода и љубов. Оваа потресна приказна раскажана во прво лице нема да ве остави рамнодушни, а патот од Багдад до Курдистан ќе почувствувате како да го чекорите заедно со неа.

Љубов во време на колера – Габриел Гарсија Маркез

Колку може да трае вистинската љубов? За Флорентино Ариза таа брои 50 години, 9 месеци и 4 дена. Тој повторно ќе ѝ ги изјави своите чувства на неговата младешка љубов Фермина Даса, веднаш по погребот на мажот за кој таа се одлучила да се омажи. Ова е љубов на долги патеки, тажна и истовремено комична, која плете искрена приказна со допадливи ликови.

Еднаш одигравме љубов – Елена Конеска

Љубовта ретко е слатка, повеќе би се согласиле дека е слатко-горчлива, нечесна, полна разочарувања, но тоа е она што ја прави реална.

Светот на 30-годишната хероина во романот ќе се преврти наопаку, откако на првото служебно патување таа ќе се вљуби во млад португалски писател. Она кое започнува како романса, а продолжува со љубовна врска на далечина, завршува со големи очекувања и разочарувања од истите. Но, патот на емоционалното созревање никогаш не е послан со рози, зарем не?

(О)Милена | Црнобело