Книги со силни женски ликови кои ќе ве инспирираат

Книгите каде што главен двигател на дејството е женски лик се особено моќни и интересни за читање. Овие книжевни хероини стануваат култни ликови и синоними за упорност, челична волја и борбеност.

Хестер, Номбеко и Нафред се три силни жени кои се врзуваат со несекојдневни предизвици и ситуации, а нивната моќ доминира во книгите кои ви ги предлагаме оваа недела.

Какви се нивните приказни?

Скарлетното слово – Натаниел Хоторн

Во пуританската Нова Англија млада жена по име Хестер Прин има вонбрачно дете. Таа е принудена на својот фустан да ја носи скарлетната буква А, во знак на казна за прељубата што ја извршила.

Лажниот морал е проткаен низ целото дејствие, а Хестер е силна, непоколеблива и има потреба да се избори и да се издигне над перцепцијата која што ја имаат останатите за неа.

Девојката што го спаси кралот на Шведска - Јонас Јонасон  

Кралот и премиерот на Шведска исчезнуваат на 14-ти јуни во 2007 година за време на гала-банкет. Останатиот дел од приказната се сели во Јужна Африка во ’60-тите години на минатиот век. Малата Номбеко Мајеки води живот во кој започнува како чистачка, а потоа неочекувано станува дел од најголемите тајни воени проекти.

Таа станува мета на Јужноафриканската Република и на најопасната тајна служба во светот истовремено. Како ќе се поврзат двете приказни останува да откриете со читањето на ова возбудливо комично четиво.

Приказната на робинката – Маргарет Атвуд

Приказната се одвива во САД, за време на владеењето на тоталитарна христијанска теократија. Жените ги губат правата и се поделени во неколку категории. Една од нив се Робинките, жени кои служат како сурогат мајки, односно „подвижни матки“.

Нафред е една од нив и се наоѓа во куќата на еден од главните Команданти кои се одговорни за создавањето на новиот устав на САД.

Робинките по правило не би требало да имаат достоинство. Тие треба само да ја исполнат целта на раѓање на детето на некој голем моќник, а потоа да завршат како непотребен вишок.

Нафред се обидува да склопи пријателства со слични Робинки, во  општество каде што никој со никого не е пријател, никому не може да му се верува и секој има одредена цел и корист. Дали таа ќе успее да забремени од Командантот?

(О)Милена | Црнобело