3 книги за опуштање кои ќе ви донесат насмевка на лицето

Заокружете го летото со три релаксирачки книги кои ќе ви донесат насмевка на лицето и ќе ве натераат да верувате во подобро утре.

Ви предлагаме две одлични книги од млади македонски авторки и хит книгата на Никола Јун - „Сè, баш сè“, кој веќе ја доживеа својата филмска премиера на 19 мај оваа година со истоимениот наслов – „Everything, Everything“.

Одвојте време за некој од следните 3 наслови и со сигурност нема да се покаете:

Скоро парижанка или (како да ги преживее своите доцни дваесетти... во Париз) - Јана Мишо  

Јана Мишо е млада македонска авторка, а нејзиното првенче „Скоро парижанка...“ прво излезе на англиски јазик, за да ја доживее и печатената македонска верзија.

Главната хероина е во криза некаде во средината на своите ’20-ти години. Таа ја губи својата работа, има длабоки чувства за тотално погрешна личност и нема поим во кој правец оди нејзиниот живот.

Сé чини дека сите работи во нејзиниот живот се движат наопаку, а Градот на светлината не е од никаква помош и е просто лош сојузник.

Ова е една симпатична, смешна и топла приказна за растењето и созревањето.

Сè, баш сè - Никола Јун  

Меди никогаш не излегла од својот дом. Единствените луѓе со кои има контакт се нејзината мајка и болничарката Карла.

Таа е алергична на светот и сé што е таму надвор. Живее со убедување дека контактот со надворешниот свет ќе ја убие.

Работите се менуваат кога во соседството доаѓа згодниот Оли. Меди ќе се вљуби и конечно ќе се охрабри и ќе ризикува да види сé што не видела никогаш.

Љубов на два континента - Марија Бабамова  

Уште еден пријатен лесен роман за читање од македонска авторка. Марија Бабамова со богат јазик исполнет со чувства, симболики и метафори детално опишува познати македонски локации, како Охрид, Маврово, Водно.

Љубовта помеѓу двајцата млади е главниот мотив, нивните доживувања и искрените исповеди.

Раскошна, богата приказна која се чита во еден здив и која ќе ви предизвика силни и носталгични чувства за родната земја.

(О)Милена | Црнобело