ЖЕНА на кориците и насловите - 3 одлични книги за женската моќ, доминација и слабост

Прочитајте нешто моќно кое ќе ви вреже длабок впечаток, наместо да ве остави рамнодушни и летаргични.

Жените отсекогаш биле огромна инспирација за авторите. Нивната комплексност, нивната убавина, нивната кршливост и доминација истовремено.

Која е вашата омилена книга со жените како главен мотив и двигател во дејствието? Доколку немате идеја што да прочитате во моментов, ние ви ги препорачуваме:

Како да заборавиш жена - Дан Лунгу

Анди и Марга работат за истиот мал весник, таа пишува „жолт“ печат, а тој е истражувачки новинар. Двајцата се поврзуваат заедно од чудни околности и живеат заедно една и пол година.

Она што наликува на убава хармонична врска наскоро се распаѓа во ненадејното заминува на Марга и нејзината чудна загадочна порака за збогум.

Анди, во потрага по рационален одговор за овој развој на настаните, преполн прашања, самоиронија и хумор налетува на група евангелистички протестанти и чувствува дека Бог е на неговата патека.

Ќе успее ли да ја заборави Марга и сите нејзини претходнички? Ќе го победи ли чувството на омраза кон сиот свет и ќе си ги врати ли мирот, наклоноста и толеранцијата?

Времето на жените - Елена Чижова

Никогаш или сосема ретко ќе ја слушнете женската историја или страна на една војна. Опсадата на Ленинград која траела 872 дена нема да ви ја раскажат славните мртви херои, оние кои ја извојувале големата „машка“ победа, туку нивните живи сопруги и сестри.

Оние кои биле сведоци како им се изгладнуваат најблиските до смрт. Оние силни жени кои морале да го продадат целото свое злато за парче сув леб за своите деца. Истите деца кои никогаш нема да ги слушнат нивните жртви и заложби на училиштето кое се борат да им го обезбедат.

Емотивен и трогателен роман за издржливоста на најсилните оревчиња, петте различни наратори во романот – жените.

Жената на францускиот поручник - Џон Фаулс

Сара Вудроф е мистериозна и фасцинантна млада жена, напуштена по кратката врска со француски поморски офицер.

Од друга страна, Чарлс Смитсон е господин кој финансиски не зависи од никого, свршен со Ернестина Фримен, убава богата наследничка и ќерка на помпезен богат трговец со стоки.

Но, Чарлс е опседнат од загадочната Сара. Тој е исполнет со страст која го води до еден вид на егзистенцијална празнина.

За него не останува никаков поинаков избор, освен да ја раскине свршувачката со Тина и да ја побара жената која ја има заробено неговата викторијанска душа.

Како ќе заврши овој заплеткан љубовен триаголник?

(О)Милена | Црнобело