Одлични српски писатели на кои треба да им дадете шанса

Факт е дека во последните неколку години во Македонија почнаа да се читаат домашни писатели, не е како порано, кога читателите правеа гримаси кога во книжарница ќе им понудат македонски автор.

Бројните изданија и промотивните дружби се само еден дел од променетата реалност за која зборувам. Сепак во никој случај не може да се споредиме со авторите од нашето соседство, Србија.

Таму првите тиражи на писателите им се како максимално продадени книги на одредени македонски автори. Некои ќе речат, ама и така е, големината на пазарот си го прави своето, но пред сé културата и навиката на читањето се пресудни во оваа ситуација.

Во продолжение следува листа на неколку српски автори, кои имаат одличен одзив кај публиката, и тежина, карактеристична за секого од нив:

Светислав Басара

Автор на дваесеттина книги – романи, збирки на раскази, драми и есеи. Неговиот роман Фама за велосипедистите се смета за еден од најдобрите српски романи од втора половина на 20. век, а за книгата Подемот и падот на паркинсоновата болест ја има добиено НИН-ова награда за најдобар роман објавен во 2006 година.

Марко Видојковиќ

Овој српски писател роден во Белград на пошироката читателската публика им стана познат со книгата Канџи, која во рок од октомври 2004. До мај 2005 година е продадена во пет изданија и воедно се смета за една од најпродаваните книги од домашен автор во Србија. Година дена подоцна за истата книга ја доби наградата Кочиќево перо, а за книгата Сите црвенкапи се исти ја има добиено Виталова награда. Неговата последна книга Е, баш ви фала изведува своевиден десант на постјугословенското општество во ера на апатија и чувство на безизлез. Книга е бестселер во Србија со продадени илјадници примероци.

Гордана Куиќ

Добитник на бројни книжевни награди во државите на поранешна Југославија и автор на романот Miris kiše na Balkanu за прв пат објавен во 1986, а сега е преточен во телевизиска серија. Таа преку оваа книга сака да ја прикаже судбината на едно еврејско семејство и дека од историјата не може да се побегне. Нејзините книжевни дела се од голема значајност, зошто на нашите простори нема голем број на еврејска литература.

Александар Гаталица

На српската книжевна сцена се појавил во 1993 година од од тогаш има објавено 11 книги. Прозата на Гаталица е преведена на десеттина книжевни јазици, а тој исто така е познат и по тоа што е преведувач. Ја има добиено најпрестижната книжевна награда во Србија НИН-ова за романот Veliki rat, а месец дена подоцна за истото дело ја има добиено наградата Меша Селимовиќ.

Автор: Евгениј Хоуп | Црнобело